మామని కిడ్నాప్ చేసిన అల్లుడు

కుటుంబ కలహాల నేపథ్యంలో ఓ అల్లుడు తన మామని కిడ్నాప్ చేసి పోలీసులకు అడ్డంగా దొరికిపోయాడు. పూర్తి వివరాల ప్రకారం... గుజరాత్ లోని ఒద్దవ్ ప్రాంతంలో నివసిస్తున్నాడు రమేష్ సిన్హ్ సోలంకి. అతని కుమార్తె భన్వర్ కి భవానీసిన్హ్ రాజ్ పుత్ తో వివాహమైంది. కాగా వీరి పెళ్లి కన్నా ముందే భవానీసిన్హ్ చెల్లెలకి రమేష్ సిన్హ్ తమ్ముడు హర్మిత్ తో పెళ్లయింది. కాగా హర్మిత్ సంసారంలో కలతలు రేగాయి. దీంతో భార్య హర్మిత్ పై గృహహింస కేసు పెట్టింది. ఆ నేపథ్యంలో వివాదాలు జరిగాయి.

కాగా రమేష్ తన తమ్ముడిపై కేసు పెట్టడాన్ని జీర్ణించుకోలేక... కూతురితో తన అల్లుడు భవానీసిన్హ్ పై కేసు పెట్టించాడు. అల్లుడికి కోపం వచ్చి ఇద్దరు వ్యక్తులతో కలిసి వచ్చి ఇంటి బయట ఉన్న రమేష్‌ను కిడ్నాప్ చేసి కారులో ఎక్కించుకుని వెళ్లిపోయారు. కుటుంబసభ్యులు పోలీసు కేసు పెట్టారు. సెల్ ఫోన్ సిగ్నల్ ఆధారంగా నిందితులు ఉన్న ప్రాంతాన్ని కనుగొని వారిని అరెస్టు చేశారు. బాధితుడిని విడిపించారు.