రిపబ్లిక్ డే: ఢిల్లీలో భద్రత కట్టుదిట్టం

గణతంత్ర దినోత్సవం నాడు వాయు మార్గం ద్వారా ఉగ్రవాదులు దాడులు చేసే అవకాశముందని నిఘా వర్గాలు హెచ్చరించాయి. దీంతో అప్రమత్తమైన ఢిల్లీ పోలీసులు భద్రత కట్టుదిట్టం చేసారు. గణతంత్ర దినోత్సవం సందర్భంగా రాష్ట్రపతి ప్రణబ్ ముఖర్జీ ప్రసంగించనున్న చారిత్రాత్మిక రాజ్‌పథ్ వద్ద భద్రతను మరింత పెంచారు. ఢిల్లీలో సుమారు 50 వేల మంది ఢిల్లీ పోలీసులు, కేంద్ర బలగాలను మోహరించారు.

లష్కరే తోయిబా వంటి ఉగ్రవాద సంస్థలు గణతంత్ర దినోత్సవం రోజున ఢిల్లీపై హెలికాప్టర్లు, చార్టర్ ఫ్లైట్స్, డ్రోన్‌లు ఉపయోగించే అవకాశముందని నిఘా వర్గాలు హెచ్చరించాయి. గాలిలో ఏదైనా అనుమానాస్పదంగా ఎగిరినట్లు తెలిస్తే దాన్ని అంతం చేయడానికి యాంటీ డ్రోన్ టెక్నాలజీని ఉపయోగిస్తున్నట్లు పోలీసులు వెల్లడించారు. అలాగే యాంటీ ఎయిర్‌క్రాఫ్ట్ గన్‌లు ధరించిన భద్రతా సిబ్బంది ఎత్తైన భవనాల పై నుంచి కాపలా కాస్తారని చెప్పారు.

సీసీటీవీ కెమెరాలను ఎప్పటికప్పుడ పర్యవేక్షించేందుకు ప్రత్యేక కంట్రోల్ రూంను కూడా ఏర్పాటు చేసారు. మరోవైపు జనవరి 26న ఉదయం 10.35 గంటల నుంచి మధ్యాహ్నం 12.15 గంటల వరకు న్యూ ఢిల్లీలోని ఇందిరా గాంధీ అంతర్జాతీయ విమానాశ్రయంలో వాణిజ్య విమానాలకు అనుమతి లేదని భద్రతా బలగాలు వెల్లడించాయి.