అమెరికాకు పూర్వవైభవం తెస్తా: డోనాల్డ్ ట్రంప్

అమెరికాకు పూర్వ వైభవం తీసుకువస్తానని ఆ దేశాధ్యక్షుడిగా ఎన్నికైన డోనాల్డ్ ట్రంప్ స్పష్టం చేశారు. అధ్యక్ష ఎన్నికల్లో విజయం ఖరారు కావడంతో ఆయన తొలిసారిగ తన మద్దతుదారులను ఉద్దేశించి ప్రసంగించారు. తన విజయానికి తోడ్పడిన వారందరికీ పేరుపేరున ధన్యవాదాలు తెలిపారు. తన తల్లితండ్రులను గుర్తుకు తెచ్చుకున్నారు. తాను అమెరికా అధ్యక్షుడిని కాబోతున్నానంటే దానికి తన తల్లితండ్రుల పెంపకమే కారణమని తన విజయాన్ని వారికి అంకితమిస్తున్నట్లు తెలిపారు. అంతేకాకుండా తన కుటుంబ సభ్యులందరినీ పేరుపేరును ప్రస్తావించారు. అమెరికా ఆర్థిక వ్యవస్థకు జవజీవాలు ఇవ్వడానికి పూర్వవైభవం తీసుకురావడానికి తన వద్ద ప్రత్యేక ప్రణాళిక ఉందని చెప్పారు.

ఈ సందర్భంగా హిల్లరీ క్లింటనును కూడా ప్రశంసించారు. విజయం కోసం ఆమె ఎంతగానో కష్టపడ్డారన్నారు. రాజకీయపరంగా తాము డెమోక్రాట్లు, రిపబ్లికన్లమే అయినప్పటికీ, జాతిపరంగా తొలుత అమెరికన్లమని వ్యాఖ్యానించారు. నిరుద్యోగ సమస్యను పారదోలేందుకు కృషి చేస్తానన్నారు. ఇదిలా ఉండగా, అధ్యక్షునిగా బాధ్యతలు చేపట్టేందుకు అవసరమైన మ్యాజిక్ ఫిగర్ దాటిన నేపథ్యంలో ఆయన ప్రత్యర్థి హిల్లరీ క్లింటన్ డోనాల్డ్ కు ఫోన్ చేసి అభినందనలు తెలిపారు.