కామన్వెల్త్ గేమ్స్: స్వర్ణంతో సత్తా చాటిన మీరాబాయి

కామన్వెల్త్ క్రీడల్లో తొలిరోజు భారత వెయిట్‌లిప్టర్లు పతకాల పంట పండిస్తున్నారు. పురుషుల వెయిట్‌ లిఫ్టింగ్‌ 56 కేజీల విభాగంలో గురురాజా రజత పతకంతో భారత్‌కి తొలి పతకాన్ని అందించగా.. మీరాబాయి చాను స్వర్ణ పతకంతో సత్తా చాటింది. తద్వారా ఈ ఏడాది కామన్వెల్త్ క్రీడల్లో స్వర్ణం సాధించిన తొలి భారత అథ్లెట్‌గా రికార్డు నెలకొల్పింది.

48 కిలోల విభాగంలో పోటీ పడిన మీరాబాయి మొత్తం 196 పాయింట్లతో అగ్రస్థానంలో నిలిచింది. స్నాచ్ రౌండ్‌లో తొలి ప్రయత్నంలో 80 కిలోల బరువెత్తిన ఆమె.. తర్వాతి ప్రయత్నాల్లో 84, 86 కిలోల బరువులెత్తింది. గతంలో 85 కిలోల బరువులెత్తడమే ఆమెకు బెస్ట్ కాగా.. ఈసారి ఆ రికార్డును తిరగరాసింది. కామన్వెల్త్‌లో 77 కిలోల బరువెత్తడమే అత్యధికం కాగా.. 86 కిలోల బరువెత్తిన ఈ మణిపురీ అమ్మాయి కామన్వెల్త్ రికార్డును బ్రేక్ చేసింది. ఓవరాల్‌గా 194 కిలోల బరువులెత్తిన ఆమె తన సమీప ప్రత్యర్థి కంటే 10 కిలోలు అధికంగా బరువులెత్తడం విశేషం.

గతంలో గ్లాస్గోలో జరిగిన కామన్వెల్త్ క్రీడల్లో మీరాబాయి రజతం సాధించింది. గత ఏడాది నవంబర్లో జరిగిన వెయిట్‌లిఫ్టింగ్ వరల్డ్ ఛాంపియన్‌షిప్‌లో మీరాబాయి స్వర్ణం సాధించింది. తద్వారా కరణం మల్లీశ్వరీ తర్వాత ఈ ఘనత సాధించిన భారతీయ మహిళా వెయిట్‌లిఫ్టర్‌గా రికార్డు నెలకొల్పింది.