ఫైనల్లో శతకం బాదేసిన పాక్ ఓపెనర్

ఛాంపియన్స్ ట్రోఫీ ఫైనల్ మ్యాచ్‌లో భారత్‌పై పాకిస్థాన్ ఓపెనర్ ఫకార్ జమాన్ శతకం బాదేశాడు. కెరీర్‌లో నాలుగో వన్డే ఆడుతున్న జమాన్ కేవలం 92 బంతుల్లోనే 12x4, 2x6 సాయంతో 100 పరుగులు చేశాడు. ఇన్నింగ్స్ 31వ ఓవర్ వేసిన స్పిన్నర్ అశ్విన్ బౌలింగ్‌లో స్వీప్ షాట్‌ ఆడి మిడ్ వికెట్‌ దిశగా బౌండరీ బాదిన జమాన్ కెరీర్‌లో తొలి సెంచరీని పూర్తి చేసుకున్నాడు. ఇన్నింగ్స్ నాలుగో ఓవర్‌లో వ్యక్తిగత స్కోరు 3 వద్దే జమాన్ ఔటైనా.. ఆ బంతిని బుమ్రా నోబాల్‌గా వేయడంతో ఈ ఓపెనర్‌కి జీవనదానం లభించింది.

దొరికిన అవకాశాన్ని రెండు చేతులా సద్వినియోగం చేసుకున్న జమాన్ మరో ఓపెనర్ అజహర్ అలీతో కలిసి తొలి వికెట్‌కి 128 పరుగుల భాగస్వామ్యం నెలకొల్పాడు. అయితే శతకం తర్వాత దూకుడు పెంచిన జమాన్ (114: 106 బంతుల్లో 12x4, 3x6).. జట్టు స్కోరు 200 వద్ద హార్దిక్ పాండ్య బౌలింగ్‌లో భారీ షాట్ కోసం ప్రయత్నించి జడేజా చేతికి చిక్కాడు. డీప్ పాయింట్‌ దిశగా వెనక్కి పరుగెత్తుకుంటూ వెళ్లి జడేజా కళ్లుచెదిరే రీతిలో బంతిని క్యాచ్‌గా అందుకున్నాడు.