సిక్స్‌ సమర్పించుకుని.. రోహిత్‌ను బుట్టలో వేశాడు

ఛాంపియన్స్ ట్రోఫీలో భాగంగా భారత్, శ్రీలంక మధ్య మ్యాచ్ ఆసక్తికరంగా జరుగుతోంది. లసిత్ మలింగ్ వేసిన ఇన్నింగ్స్ తొలి బంతినే బౌండరీకి తరలించిన భారత్ ఓపెనర్ రోహిత్ శర్మ తన ఆధిపత్యాన్ని ఆరంభించగా.. పక్కా ప్లానింగ్‌తో సిక్స్ సమర్పించుకుని మరీ అతడ్ని లంక ఫాస్ట్ బౌలర్ బుట్టలో వేయడం విశేషం.

ఇన్నింగ్స్ 25వ ఓవర్‌లోని నాలుగో బంతిని లెగ్ వికెట్ మీదుగా గుడ్ షార్ట్ లెంగ్త్ రూపంలో మలింగ విసరగా.. షాట్‌కి అనుగుణంగా భుజాలను వేగంగా కదిలించిన రోహిత్ శర్మ డీఫ్ ఫైన్ లెగ్ దిశగా కళ్లు చెదిరే రీతిలో సిక్స్ కొట్టాడు. బంతి బౌండరీ లైన్‌ అవల కొద్ది దూరంలో మాత్రమే పడింది. నిజానికి అప్పటి వరకు అక్కడే ఉన్న ఫీల్డర్ తిసార పెరీరాను లాంగ్ లెగ్ దిశగా మలింగనే మార్చాడు. ఒకవేళ ఫీల్డర్ అక్కడే ఉన్నట్లయితే బంతిని క్యాచ్‌గా అందుకునే అవకాశాలు ఉండేవి.

ఈ సిక్స్ చూసిన తర్వాత మలింగ తన తప్పిదాన్ని గుర్తించి.. పెరీరాను అప్రమత్తం చేశాడు. తర్వాత బంతిని కూడా గుడ్ లెంగ్త్ రూపంలో విసిరాడు. కానీ.. ఈ సారి లెగ్ వికెట్‌ కాకుండా.. ఆఫ్ వికెట్‌ని లక్ష్యంగా చేసుకున్నాడు. ఈ మార్పుని వేగంగా పసిగట్టలేకపోయిన రోహిత్ శర్మ.. ముందు తరహా షాట్‌ ఆడి తిసార పెరీరా చేతికే చిక్కాడు. తొలి షాట్‌లో వేగంగా భుజాలను కదిపిన రోహిత్.. రెండో సారి పూర్తి స్థాయిలో బంతిని కొట్టలేకపోయాడు. దీంతో 24.5 ఓవర్లలో 138 పరుగుల తొలి వికెట్ భాగస్వామ్యానికి తెరపడింది. టోర్నీలో వరుసగా రెండోసారి రోహిత్ శర్మ (78: 79 బంతుల్లో 6x4, 3x6) శతకానికి దగ్గరగా ఔటై నిరాశగా పెవిలియన్ బాట పట్టాడు.