నా జీవితంలోకి అలాంటి రోజు వస్తుందా..?

భారత కెప్టెన్ విరాట్ కోహ్లి, బాలీవుడ్ నటి అనుష్క శర్మ ప్రేమాయణం గురించి అందరికీ తెలిసిందే. విరాట్ గురించి అనుష్క శర్మ ఎక్కడా బహిరంగంగా పెదవి విప్పనప్పటికీ.. వివాహ వేడుకలకి, విహార యాత్రలకి ఈ జంట వెళుతూ మీడియా కంట పడుతూనే ఉంది. తాజాగా అనుష్క శర్మ తన ‘అదృష్ట దేవ‌త‌’ అంటూ విరాట్ కోహ్లి పొగడ్తల వర్షం కురిపించాడు. ప్రస్తుతం ఛాంపియన్స్ ట్రోఫీలో భాగంగా ఇంగ్లాండ్‌లో ఉన్న కోహ్లి ఒక స్పోర్ట్స్ ఛానల్‌‌కి ఇచ్చిన ఇంటర్వ్యూలో అనుష్కతో తనకు ఎలా కలిసొచ్చిందో వివరించాడు.

‘గత ఏడాది నవంబరులో ఇంగ్లాండ్‌తో మొహాలి వేదికగా మూడో టెస్టు మ్యాచ్ ఆసక్తికరంగా కొనసాగుతోంది. అనుష్క శర్మ నన్ను కలిసేందుకు అక్కడికి వచ్చింది. ఆశ్చర్యకరంగా వన్డే, టీ20 కెప్టెన్సీ బాధ్యతలు అందుకోవాల్సిందిగా ఆ రోజే నాకు కబురు వచ్చింది. 2014, డిసెంబరు 30న కూడా ఇలానే నా జీవితంలో మరిచిపోలేని క్షణానికి అనుష్క సాక్షంగా నిలిచింది. ఆ రోజు మెల్‌బోర్న్ వేదికగా ఆస్ట్రేలియాతో టెస్టు మ్యాచ్ డ్రాగా ముగిసింది. అనూహ్యంగా మహేంద్ర సింగ్ ధోనీ కెప్టెన్సీ బాధ్యతల నుంచి తప్పుకుంటున్నట్లు ప్రకటించాడు. దీంతో భారత్ టెస్టు జట్టుకి కెప్టెన్‌‌ అయ్యాను. ఆ రోజు కూడా అనుష్క మెల్‌బోర్న్‌లోనే ఉంది’ అని కోహ్లి వివరించాడు.

భారత్ జట్టుకి పూర్తి స్థాయిలో కెప్టెన్సీ బాధ్యతలు అందుకోబోతున్నానని మొహాలిలో తెలియగానే.. అంతకముందే అనుష్క నాతో చెప్పిన మాటలు నాకు గుర్తుకు వచ్చాయి. వెంటనే తన‌తో మాట్లాడాను. క్రికెట్‌లో ఓనమాలు నేర్చుకుంటున్న దశ నుంచి భారత్ జట్టుకి కెప్టెన్ అయ్యే వరకు జరిగిన సంఘటనల్ని ఒకసారి తలుచుకుని భావోద్వేగానికి గురయ్యాను. ఆ సమయంలో నా కంట్లో నీళ్లు తిరిగాయి. నా జీవితంలోకి ఇలాంటి రోజు వస్తుందని ఎప్పుడూ ఊహించలేదు’ అని కోహ్లి వెల్లడించాడు.