పాక్ జట్టులో బౌలర్ అమీర్ లేడేంటి..?

ఛాంపియన్స్ ట్రోఫీలో పాకిస్థాన్ సెమీస్ చేరడంలో ఫాస్ట్ బౌలర్ మహ్మద్ అమీర్ కీలక పాత్ర పోషించాడు. అయితే ఇంగ్లాండ్‌తో బుధవారం జరుగుతున్న తొలి సెమీ ఫైనల్‌కి అతను జట్టులో లేకపోవడంతో అంతా ఆశ్చర్యం వ్యక్తం చేస్తున్నారు. శ్రీలంకతో జరిగిన చివరి మ్యాచ్‌లో ఓటమి అంచున నిలిచిన పాక్ జట్టును మహ్మద్ అమీర్‌తో కలిసి కెప్టెన్ సర్ఫరాజ్ అహ్మద్ గెలిపించాడు. చివర్లో వికెట్ల పతనానికి అడ్డుకట్టవేసిన ఈ జోడి అజేయంగా 75 పరుగుల భాగస్వామ్యం నెలకొల్పి ప్రశంసలు అందుకుంది.

భారత్‌తో జరిగిన టోర్నీ తొలి మ్యాచ్‌లోనే ఫిటెనెస్‌లేమితో కనిపించిన మహ్మద్ అమీర్.. శ్రీలంకతో మ్యాచ్‌లో గాయపడినట్లు తెలుస్తోంది. వెన్నునొప్పి కారణంగా అమీర్ తొలి సెమీ ఫైనల్ మ్యాచ్‌కి దూరమయ్యాడని.. అతని స్థానంలో రుమాన్ రేస్ తీసుకున్నట్లు పాక్ మేనేజ్‌మెంట్ ప్రకటించింది. పొదుపుగా బౌలింగ్ చేయడంతో పాటు కీలక భాగస్వామ్యాలను విడదీయడంలో అమీర్‌ది అందివేసిన చేయి. మరోవైపు ఇంగ్లాండ్ కూడా ఓపెనర్ జేసన్‌రాయ్‌పై వేటు వేసి.. అతని స్థానంలో బారిస్టోని తీసుకుంది.