అది అసలు వన్డేలాడే పిచ్‌లా ఉందా..?

ఛాంపియన్స్ ట్రోఫీకి ముందు ఇంగ్లాండ్‌కి చేదు అనుభవాన్ని మిగిల్చిన వన్డే మ్యాచ్‌పై ఆ జట్టు కెప్టెన్ మోర్గాన్ వివరణ ఇచ్చే ప్రయత్నం చేశాడు. లార్డ్స్‌ వేదికగా సోమవారం ముగిసిన ఈ వన్డే‌లో పేలవ ప్రదర్శన చేసిన ఇంగ్లాండ్ జట్టు చివరికి దక్షిణాఫ్రికా చేతిలో 7 వికెట్ల తేడాతో ఓటమిపాలైంది.

పేసర్లకి స్వర్గధామంగా మారిన లార్డ్స్‌ పిచ్‌పై రబాడ ధాటికి తొలుత బ్యాటింగ్ చేసిన ఇంగ్లాండ్ మొదట ఐదు ఓవర్లు ముగిసే సమయానికే 20/6తో పీకల్లోతు కష్టాల్లో పడిపోయింది. చివరికి బారిస్టో అర్ధశతకం బాదడంతో ఆ జట్టు 31.1 ఓవర్లలో 153 పరుగులకు ఆలౌటవగా.. 28.5 ఓవర్లలో దక్షిణాఫ్రికా మూడు వికెట్లు నష్టపోయి లక్ష్యాన్ని ఛేదించింది.

‘లార్డ్స్‌ పిచ్ అసలు వన్డే మ్యాచ్‌లాడే పిచ్‌లా కనిపించలేదు. ఆరంభంలోనే మ్యాచ్ ఏకపక్షంగా మారిపోయింది. ఇలాంటి పిచ్‌లు ఏ జట్టుకైనా మంచివి కావు. పిచ్‌పై పచ్చిక ఎక్కువగా ఉండటంతో పేసర్లకి స్వర్గధామంలా మారిపోయింది’ అని మోర్గాన్ నిరాశ వ్యక్తం చేశాడు. వన్డే క్రికెట్ చరిత్రలోనే అంత వేగంగా ఒక జట్టు ఆరు వికెట్ పడటం ఇదే తొలిసారి. ఛాంపియన్స్ ట్రోఫీ కూడా ఇంగ్లాండ్‌లోనే జరగనున్న నేపథ్యంలో క్యురేటర్లు ఇకనైనా పిచ్ తయారీ విషయంలో జాగ్రత్తలు తీసుకుంటారేమో చూడాలి.