పాక్ ఓపెనర్ అర్ధశతకం.. ఫైనల్‌కి బాటలు

ఛాంపియన్స్ ట్రోఫీ ఫైనల్‌కి పాకిస్థాన్ బాటలు వేసుకుంది. ఇంగ్లాండ్‌తో కార్ఢిఫ్ వేదికగా జరుగుతున్న సెమీ ఫైనల్ మ్యాచ్‌లో 212 పరుగుల లక్ష్యఛేదనకు దిగిన పాకిస్థాన్ 18 ఓవర్లు ముగిసే సమయానికే వికెట్ నష్టపోకుండా 105 పరుగులతో మెరుగైన స్థితిలో నిలిచింది. ఓపెనర్ జమామ్ (50: 49 బంతుల్లో 6x4, 1x6) అర్ధ శతకంతో రాణించాడు. అతనికి తోడుగా మరో ఓపెనర్ అజహర్ అలీ (42: 56 బంతుల్లో 3x4, 1x6) నిలకడగా ఆడుతుండటంతో పాక్ సాఫీగా గెలుపు దిశగా సాగిపోతోంది.

అంతకముందు పాకిస్థాన్‌ బౌలర్లు హసన్ అలీ (3/35), జునైద్ ఖాన్ (2/42), రుమాన్ రేస్ (2/44) ధాటికి మొదట బ్యాటింగ్ చేసిన ఇంగ్లాండ్ 211 పరుగులకే ఆలౌటైన విషయం తెలిసిందే. పాక్ ఓపెనింగ్ జోడిని విడదీసేందుకు ఇంగ్లాండ్ కెప్టెన్ మోర్గాన్ బౌలర్లను వరుసగా మారుస్తున్నా ఫలితం రాబట్టలేకపోతున్నాడు. పాక్ విజయానికి ఇంకా 32 ఓవర్లలో 107 పరుగులు చేయాల్సి ఉంది. చేతిలో 10 వికెట్లు ఉండటంతో ఆ జట్టు విజయం నల్లేరుపై నడకే.