పాక్‌పై అర్ధ శతకాలు బాదేసిన ఓపెనర్లు

ఛాంపియన్స్ ట్రోఫీలో భాగంగా పాకిస్థాన్‌తో జరుగుతున్న మ్యాచ్‌లో భారత్ ఓపెనర్లు రోహిత్ శర్మ, శిఖర్ ధావన్ జట్టుకు మెరుపు ఆరంభమిచ్చారు. ఇన్నింగ్స్ 19వ ఓవర్ వేసిన షదబ్ ఖాన్ బౌలింగ్‌లో సిక్స్‌తో రోహిత్ శర్మ(62: 80 బంతుల్లో 6x4, 1x6) అర్ధ శతకాన్ని పూర్తి చేసుకోగా.. తర్వాత ఓవర్ వేసిన రియాజ్ బౌలింగ్‌లో హ్యాట్రిక్ ఫోర్లు బాదేసిన శిఖర్ ధావన్ (63: 59 బంతుల్లో 5x4, 1x6) కూడా 50 పరుగుల మైలురాయిని అందుకున్నాడు. వీరిద్దరి జోరుతో భారత్ 23 ఓవర్లు ముగిసే సమయానికి వికెట్ నష్టపోకుండా 129 పరుగులతో భారీ స్కోరుకు బాటలు వేసుకుంది.

భావోద్వేగాలతో నిండిన మ్యాచ్ కావడంలో ఆరంభంలో ఈ ఓపెనింగ్ జోడి ఆచితూచి బ్యాటింగ్ చేసింది. దీంతో 10 ఓవర్లు ముగిసే సమయానికి భారత్ స్కోరు 46 మాత్రమే. కానీ.. ఆ తర్వాత క్రమంగా రోహిత్ శర్మ బ్యాట్ ఝళిపించగా.. మరో ఎండ్‌లో శిఖర్ ధావన్ కూడా అందుకున్నాడు. దీంతో పాకిస్థాన్ బౌలర్లకి బౌండరీల మోత తప్పలేదు.