పాక్ కూడా సెమీస్‌కి వచ్చేసిందోచ్..!

ఛాంపియన్స్ ట్రోఫీలో అంచనాల్లేకుండా బరిలోకి దిగిన పాకిస్థాన్ సెమీస్ బెర్త్ కొట్టేసింది. శ్రీలంకతో సోమవారం జరిగిన అమీతుమీ మ్యాచ్‌లో పాకిస్థాన్ మూడు వికెట్ల తేడాతో అనూహ్య విజయాన్ని అందుకుంది. 237 పరుగుల లక్ష్య ఛేదనలో పాక్ ఒకానొక దశలో 162/7తో ఓటమి అంచున నిలిచింది. కానీ.. కెప్టెన్ సర్ఫరాజ్ అహ్మద్ (61 నాటౌట్: 79 బంతుల్లో 5x4) టెయిలెండర్ మహ్మద్ అమీర్ (28 నాటౌట్: 43 బంతుల్లో 1x4)తో కలిసి పట్టుదలతో చివరి వరకూ పోరాడి జట్టును గెలిపించుకున్నాడు.

శ్రీలంక ఫీల్డర్ల తప్పిదాలను సొమ్ము చేసుకున్న ఈ జోడి 8వ వికెట్‌కి 75 పరుగుల అజేయ భాగస్వామ్యం నెలకొల్పడంతో పాక్ 44.5 ఓవర్లలో 237/7తో విజయాన్ని అందుకుంది. అంతకముందు పాకిస్థాన్ బౌలర్లు జునైద్ ఖాన్ (3/36), మహ్మద్ అమీర్ (2/40) ధాటికి తొలుత బ్యాటింగ్ చేసిన శ్రీలంక 49.2 ఓవర్లలో 236 పరుగులకే కుప్పకూలిపోయింది. ఓపెనర్ డిక్వెల్లా (73: 86 బంతుల్లో 4x4) ఒక్కడే అర్ధశతకంతో ఫర్వాలేదనిపించాడు.

టోర్నీలో భాగంగా ఇంగ్లాండ్‌తో తొలి సెమీ ఫైనల్‌లో బుధవారం పాకిస్థాన్ తలపడనుండగా.. బంగ్లాదేశ్‌ని గురువారం భారత్ రెండో సెమీ ఫైనల్‌లో ఢీకొంటుంది. ఫైనల్ మ్యాచ్ ఆదివారం జరగనుంది.