గంగూలీనా మజాకా.. షేన్‌వార్న్ ఓడిపోయాడు

మైదానంలో తన దూకుడుతో ప్రత్యర్థులకి సవాల్ విసురుతూ వచ్చిన భారత మాజీ కెప్టెన్ సౌరవ్ గంగూలీ.. క్రికెట్ వ్యాఖ్యాతగా కూడా తనదైన శైలిలో దూకుడు కొనసాగిస్తున్నాడు. ఛాంపియన్స్ ‌ట్రోఫీకి కామెంటేటర్‌గా పనిచేస్తున్న గంగూలీతో ఆస్ట్రేలియా మాజీ క్రికెటర్లు మైకెల్ క్లార్క్, షేన్‌వార్న్‌లు చిన్నస్థాయి మాటల యుద్ధానికి దిగి అది కాస్తా పందెం వరకూ వెళ్లింది. చివరికి గంగూలీ గెలవడంతో కంగారూలు తోకముడవాల్సి వచ్చింది.

ఛాంపియన్స్ ట్రోఫీ ఫైనల్లో భారత్ ,ఆస్ట్రేలియా తలపడతాయని మైకెల్ క్లార్క్ అంచనా వేయగా.. గంగూలీ మాత్రం భారత్, ఇంగ్లాండ్ తలపడతాయని అభిప్రాయపడ్డాడు. దీంతో పక్కనే ఉన్న షేన్ వార్న్ కలగజేసుకుని మొదట గ్రూప్ దశలో ఆస్ట్రేలియా జట్టును ఇంగ్లాండ్ ఓడిస్తే చాలని హేళనగా మాట్లాడాడు. అంతేకాకుండా అలా ఓడిస్తే.. తాను ఇంగ్లాండ్ జట్టు జెర్సీని ఒక రోజంతా ధరిస్తానని పందెం కట్టాడు.

ఎడ్జ్‌బాస్టన్ వేదికగా గత శనివారం జరిగిన మ్యాచ్‌లో 40 పరుగుల తేడాతో ఆస్ట్రేలియా జట్టును ఇంగ్లాండ్ ఓడించింది. దీంతో ‘గంగూలీ పందెంలో నువ్వే గెలిచావు. నేను ఇంగ్లాండ్ జెర్సీని వెతుకుతున్నాను’ అని మ్యాచ్ ముగియగానే వార్న్ ట్వీట్ చేశాడు. కానీ పాపం ఈ దిగ్గజ స్పిన్నర్‌కి జెర్సీ దొరికినట్లు లేదు. మళ్లీ గంగూలీనే ఒక జెర్సీని సంపాదించి తనకు పంపమని అభ్యర్థించాడు. అప్పుడు ఆ షర్ట్‌ని ధరించి సెల్ఫీ కూడా పంపిస్తానని ట్వీట్ చేశాడు.