Rohit Sharma రికార్డ్ బ్రేక్ చేస్తే కప్ గెలిచినట్టే.. రేసులో రూట్‌, విలియమ్సన్

వరల్డ్ కప్ 2019 తుది అంకానికి చేరుకుంది. ఆదివారం జరిగే ఫైనల్లో గెలిచిన జట్టు విశ్వవిజేతగా అవతరించనుంది. ఇంగ్లాండ్, న్యూజిలాండ్‌లలో తొలిసారి వరల్డ్ కప్ గెలిచే జట్టేదో ఆదివారం తేలనుంది. భారత్ పోరాటం సెమీఫైనల్లో ముగిసింది. కానీ ఈ వరల్డ్ కప్‌లో టీమిండియా ఓపెనర్ రోహిత్ శర్మ అద్భుతమైన ఆటతీరుతో టాప్ స్కోరర్‌గా కొనసాగుతున్నాడు. 9 మ్యాచ్‌ల్లో ఐదు శతకాలు బాదిన హిట్ మ్యాన్ 81 సగటుతో 648 పరుగులు చేశాడు. ఆస్ట్రేలియా ఓపెనర్ డేవిడ్ వార్నర్ 10 మ్యాచ్‌ల్లో 71.89 సగటుతో 647 పరుగులతో రెండోస్థానంలో ఉన్నాడు.

8 మ్యాచ్‌ల్లో 2 సెంచరీలతో 606 పరుగులు చేసిన షకీబుల్ హసన్ మూడోస్థానంలో, 10 మ్యాచ్‌ల్లో 549 పరుగులు చేసిన జో రూట్ నాలుగోస్థానం, 8 మ్యాచ్‌ల్లో 91.33 యావరేజ్‌తో 548 పరుగులు చేసిన కేన్ విలియమ్సన్ ఐదోస్థానంలో ఉన్నాడు. 507 రన్స్ చేసిన ఆరోన్ ఫించ్ ఆరోస్థానంలో, 10 మ్యాచ్‌ల్లో 496 రన్స్ చేసిన జానీ బెయిర్‌స్టో ఏడోస్థానంలో ఉన్నారు.

ఇంగ్లాండ్, న్యూజిలాండ్ మధ్య ఫైనల్ జరగనున్న నేపథ్యంలో.. రోహిత్ శర్మను వెనక్కి నెట్టి టోర్నీలో అత్యధిక పరుగులు చేసిన ఆటగాడిగా నిలిచే అవకాశం ముగ్గురు ఆటగాళ్లకు ఉంది. ఇంగ్లాండ్ స్టార్ ప్లేయర్ జో రూట్, కివీస్ కెప్టెన్ కేన్ విలియమ్సన్.. సెంచరీలు బాదితే రోహిత్‌ను వెనక్కి నెట్టేస్తారు. రోహిత్‌ను దాటేయాలంటే.. ఇంగ్లిష్ ఓపెనర్ జానీ బెయిర్ స్టో 153 పరుగులు చేయాలి. సెమీఫైనల్స్‌లో తక్కువ స్కోరు నమోదైనట్టుగానే.. ఫైనల్లోనూ జరిగే అవకాశం ఉంది. అదే జరిగితే రోహిత్ రికార్డు పదిలంగా ఉంటుంది. ఇరు జట్లు భారీగా పరుగులు సాధిస్తే మాత్రం.. మంచి ఫామ్‌లో ఉన్న కేన్ విలియమ్సన్ లేదా జో రూట్.. రోహిత్‌ను వెనక్కి నెట్టే అవకాశాలు ఎక్కువగా ఉన్నాయి.

న్యూజిలాండ్‌తో జరిగిన సెమీస్‌లో రోహిత్ కేవలం 1 పరుగు మాత్రమే చేయగా.. ఇంగ్లాండ్‌తో జరిగిన మరో సెమీస్‌లో వార్నర్ 9 పరుగులకే ఔటయ్యాడు. వీరిద్దరూ తక్కువ స్కోరుకే పెవిలియన్ చేయడం భారత్, ఆసీస్‌ల ఫైనల్ అవకాశాలపై తీవ్ర ప్రభావం చూపిందనే సంగతి తెలిసిందే.