India vs SA World Cup: భారత్‌తో మ్యాచ్‌కు ముందు సఫారీలకు షాక్.. వరల్డ్ కప్ నుంచి స్టెయిన్ ఔట్

వరల్డ్ కప్‌‌‌ను పేలవంగా ఆరంభించిన దక్షిణాఫ్రికాకు భారత్‌తో జరగనున్న కీలక మ్యాచ్ ముందు ఎదురు దెబ్బ తగిలింది. భుజం కారణంగా పేసర్ డేల్ స్టెయిన్ వరల్డ్ కప్‌ నుంచి వైదొలిగాడు. భుజం గాయం కారణంగా ఐపీఎల్‌కు దూరమైన స్టెయిన్.. గాయం తగ్గకపోవడంతో.. వరల్డ్ కప్‌లో తొలి రెండు మ్యాచ్‌ల్లో ఆడలేకపోయాడు. సౌతాఫ్రికా తరఫున వన్డేల్లో అత్యధిక వికెట్లు తీసిన బౌలర్‌గా రికార్డ్ నెలకొల్పిన స్టెయిన్‌ను మూడేళ్లుగా భుజం గాయం వేధిస్తోంది. 2016లో అతడి భుజానికి శస్త్రచికిత్స జరిగినప్పటికీ.. గాయం పదే పదే తిరగబెడుతోంది.

వరల్డ్ కప్ ఆరంభ మ్యాచ్‌లో ఇంగ్లాండ్ చేతిలో ఓడిన దక్షిణాఫ్రికా.. తర్వాతి మ్యాచ్‌లో అనూహ్యంగా బంగ్లా చేతిలో ఓటమిపాలైంది. బుధవారం భారత్‌తో మూడో వన్డే మ్యాచ్‌ ఆడే సన్నద్ధం అవుతోంది. ఎడమ కాలి గాయం కారణంగా లుంగి ఎంగిడి కూడా భారత్‌‌తో మ్యాచ్‌కు దూరమయ్యాడు. కోహ్లి సేనతో మ్యాచ్‌కల్లా స్టెయిన్ ఫిట్ అవుతాడని భావించినప్పటికీ.. అతడు ఏకంగా వరల్డ్ కప్‌కి దూరం కావడం సౌతాఫ్రికాకు ఓ రకంగా షాక్ అనే చెప్పొచ్చు.

స్టెయిన్ స్థానంలో లెఫ్ట్ ఆర్మ్ పేసర్ బ్యూరాన్ హెండ్రిక్స్‌ను జట్టులోకి తీసుకున్నారు. గంటకు 140 కి.మీ. వేగంతో బౌలింగ్ చేయగల సత్తా అతడి సొంతం. ఈ ఏడాది జనవరిలో పాకిస్థాన్‌తో జరిగిన మ్యాచ్ ద్వారా హెండ్రిక్స్ వన్డేల్లోకి అడుగుపెట్టాడు. ఇప్పటి వరకు రెండు వన్డేలు మాత్రమే ఆడి ఒక వికెట్ పడగొట్టగలిగాడు. టీ20ల్లో రాణించిన హెండ్రిక్స్‌తో పాక్‌తో జరిగిన మ్యాచ్‌లో 14 పరుగులు ఇచ్చి 4 వికెట్లు తీసి సత్తా చాటాడు.