ఐపీఎల్ 2020లో RCB‌కి అతిపెద్ద నిరాశ.. ఆ హిట్టరే: ఆకాశ్ చోప్రా

ఐపీఎల్ 2020లో రాయల్ ఛాలెంజర్స్ బెంగళూరు టీమ్‌లో ఓపెనర్ అరోన్ ఫించ్ తనని చాలా నిరుత్సాహపరిచాడని భారత మాజీ క్రికెటర్ ఆకాశ్ చోప్రా పెదవి విరిచాడు. సీజన్‌లో 12 మ్యాచ్‌లాడిన అరోన్ ఫించ్ 111.20 స్ట్రైక్‌రేట్‌తో 268 పరుగులు చేశాడు. ఇందులో ఒక హాఫ్ సెంచరీ మాత్రమే ఉండగా.. అతని సహచర ఓపెనర్ దేవదత్ పడిక్కల్ ఐదు హాఫ్ సెంచరీలతో 473 పరుగులు చేసిన విషయం తెలిసిందే. ఐపీఎల్ వేలంలో పడిక్కల్‌ని కేవలం రూ.20 లక్షలు వెచ్చించి ఆర్సీబీ కొనుగోలు చేయగా.. అరోన్ ఫించ్‌ కోసం ఏకంగా రూ.4.40 కోట్లు వెచ్చించడం గమనార్హం.

‘‘బెంగళూరు టీమ్‌లో అరోన్ ఫించ్ ప్రదర్శన ఎక్కువగా నిరాశపరిచింది. అతని కోసం వేలంలో ఆర్సీబీ పెద్ద మొత్తంలో వెచ్చించింది. సీజన్‌లోనూ 12 మ్యాచ్‌ల్లో అవకాశం ఇచ్చి.. అతని నుంచి హిట్టింగ్‌ని ఆశించింది. కానీ.. అతను పూర్తిగా తేలిపోయాడు. అంతర్జాతీయ క్రికెట్ అనుభవం ఏమాత్రం లేని దేవదత్ పడిక్కల్ ఒక ఎండ్‌లో నిలకడగా ఆడుతున్నా.. అరోన్ ఫించ్ ప్రతి మ్యాచ్‌లోనూ వికెట్ చేజార్చుకోవడం ద్వారా విరాట్ కోహ్లీ, ఏబీ డివిలియర్స్‌పై ఒత్తిడి పెంచాడు. చివరికి మూడు మ్యాచ్‌ల్లో వేటు వేసి మళ్లీ అవకాశం ఇచ్చినా.. అతని ఆటతీరు మారలేదు. సీజన్‌లో అతను ఏమాత్రం అంచనాల్ని అందుకోలేకపోయాడు’’ అని ఆకాశ్ చోప్రా వెల్లడించాడు.

వాస్తవానికి అంతర్జాతీయ టీ20ల్లో అరోన్ ఫించ్‌కి భారీగా రికార్డులు ఉన్నాయి. ఇప్పటి వరకూ 64 అంతర్జాతీయ టీ20 మ్యాచ్‌లాడిన ఫించ్.. 154.65 స్ట్రైక్‌రేట్‌తో ఏకంగా 2,114 పరుగులు చేశాడు. ఇందులో రెండు శతకాలు ఉండగా.. అతని అత్యధిక స్కోరు 172 పరుగులు కావడం గమనార్హం. కానీ.. ఐపీఎల్ 2020లో ఫించ్ అత్యధిక స్కోరు 52 పరుగులే.