డివిలియర్స్ సమయస్ఫూర్తి.. తప్పిన ప్రమాదం

దక్షిణాఫ్రికా హిట్టర్ ఏబీ డివిలియర్స్ మైదానంలో ఎంత చురుగ్గా ఉంటాడో అందరికీ తెలిసిందే. క్రీజులో మెరుపు వేగంతో పాదాల కదలికలను మార్చుకుంటూ మైదానం నలువైపులా అతను కొట్టే షాట్స్‌‌ అందరికీ సుపరిచితమే. అభిమానులు ముద్దుగా ‘360 డిగ్రీలు’ అని పిలుచుకునే డివిలియర్స్.. ఆదివారం రాత్రి గాయపడే ప్రమాదం నుంచి తృటిలో బయటపడ్డాడు.

ఐపీఎల్‌లో భాగంగా రాయల్ ఛాలెంజర్స్ బెంగళూరుతో జరిగిన మ్యాచ్‌లో కోల్‌కతా విజయానికి చివరి 15 బంతుల్లో 13 పరుగులు చేయాల్సి వచ్చింది. ఈ దశలో క్రిస్‌వోక్స్ విసిరిన బంతిని హిట్టర్ రసెల్ లాంగాన్ దిశగా గాల్లోకి లేపేశాడు. దీంతో.. ఎక్స్‌ట్రా కవర్‌లో ఫీల్డింగ్ చేస్తున్న ఏబీ డివిలియర్స్ క్యాచ్ కోసం పరుగెత్తుకుంటూ రాగా.. ఆ క్యాచ్ కోసమే.. మిడ్ వికెట్ నుంచి మెక్‌కలమ్ కూడా వచ్చాడు. అయితే.. ముందుగా అక్కడికి వచ్చిన ఏబీ డివిలియర్స్ క్యాచ్ అందుకోగా.. బంతిని మాత్రమే చూస్తూ వచ్చిన మెక్‌కలమ్ వేగంగా వచ్చి ఏబీ కాళ్ల‌కి అడ్డంగా పడిపోయాడు. ప్రమాదాన్ని పసిగట్టిన ఏబీ డివిలియర్స్ సమయస్ఫూర్తితో వ్యవహరించి మెక్‌కలమ్‌పై అడుగుపెట్టకుండా.. పక్కకి ఎగిరాడు.

ఏబీ డివిలియర్స్ క్యాచ్ పట్టిన వీడియో కోసం క్లిక్ చేయండి..!
గత రెండేళ్లుగా వెన్నునొప్పితో బాధపడిన ఏబీ డివిలియర్స్ ఇటీవల కోలుకున్నాడు. గత ఏడాది ఐపీఎల్‌లో కూడా ఈ నొప్పి కారణంగానే కొన్ని మ్యాచ్‌లు ఆడలేకపోయాడు. మెక్‌కలమ్ తత్తరపాటుతో ఒకవేళ డివిలియర్స్‌ నేలపై అడ్డంగా పడిపోయి ఉంటే.. మళ్లీ ఆ నొప్పి తిరగలోడేది. కిందపడిన మెక్‌కలమ్‌ను చూసుకోకుండా.. షూతో తొక్కి ఉంటే అతనికీ గాయమయ్యేది. ఎట్టకేలకి ఏబీ చురుకుదనం కారణంగా.. ఇద్దరూ ప్రమాదం నుంచి బయటపడటంతో.. రాయల్ ఛాలెంజర్స్ బెంగళూరు జట్టు ఊపిరి పీల్చుకుంది. ఈ మ్యాచ్‌లో కోల్‌కతా 4 వికెట్ల తేడాతో గెలుపొందింది.