రసెల్‌కి ర్యాంప్ షాట్‌తో రాయుడు సమాధానం

ఐపీఎల్‌లో ఓ సరికొత్త షాట్‌‌కి చెన్నై సూపర్ కింగ్స్ బ్యాట్స్‌మెన్ అంబటి రాయడు ప్రాణం పోశాడు. కోల్‌కతా నైట్‌రైడర్స్‌తో చెపాక్ వేదిగా మంగళవారం రాత్రి జరిగిన మ్యాచ్‌లో అండ్రీ రసెల్ బౌలింగ్‌లో రాయుడు కొట్టిన ర్యాంప్ షాట్ అభిమానుల్ని అమితంగా ఆకర్షించింది. 203 పరుగుల లక్ష్యఛేదనకి దిగిన చెన్నై సూపర్ కింగ్స్ జట్టు విజయానికి 93 బంతుల్లో 146 పరుగులు చేయాల్సిన దశలో రసెల్ అవుట్ సైడ్ ఆఫ్‌లో.. షార్ట్ లెంగ్త్ రూపంలో విసిరిన బంతిని రాయుడు లేట్ కట్ ద్వారా.. థర్డ్ మ్యాన్ దిశగా బౌండరీకి తరలించి విధానం అభిమానుల్ని మంత్రముగ్ధుల్ని చేసింది.

Click Here : రాయుడు కొట్టిన ర్యాంప్ షాట్ వీడియో కోసం క్లిక్ చేయండి

ఈ మ్యాచ్‌లో తొలుత రసెల్ (88: 36 బంతుల్లో 1x4, 11x6) చెలరేగడంతో కోల్‌కతా నైట్‌రైడర్స్ జట్టు నిర్ణీత 20 ఓవర్లలో 6 వికెట్ల నష్టానికి 202 పరుగులు చేసింది. అనంతరం ఛేదనలో వాట్సన్ (42: 19 బంతుల్లో 3x4, 3x6), రాయుడు (39: 26 బంతుల్లో 3x4, 2x6), శామ్ బిల్లింగ్స్ (56: 23 బంతుల్లో 2x4, 5x6) దూకుడుగా ఆడటంతో 19.5 ఓవర్లలో 205/5తో చెన్నై విజయం సాధించింది. బ్యాట్‌తో చెన్నై బౌలర్లని ఉతికారేసిన రసెల్‌‌ బౌలింగ్‌లోనూ వరుస బౌన్సర్లతో ప్రమాదకరంగా కనిపించాడు. అయితే.. అతడ్ని సమర్థంగా ఎదుర్కొన్న రాయుడు చక్కటి షాట్లతో సమాధానమిచ్చాడు. ఆండ్రీ రసెల్ నా ర్యాంప్ షాట్ ఎలా ఉందంటూ..? రాయుడు అతనివైపు చూడటం చెన్నై అభిమానుల ఆనందాన్ని రెట్టింపు చేసింది.