CSK టీమ్‌కి బిగ్ షాక్.. రూ.16.25 కోట్ల ఆల్‌రౌండర్ బౌలింగ్ చేయడట!

ఐపీఎల్ 2023 ముంగిట చెన్నై సూపర్ కింగ్స్ (CSK) జట్టుకి ఊహించని షాక్ తగిలింది. మార్చి 31 నుంచి ఐపీఎల్ 2023 (IPL 2023) సీజన్ మ్యాచ్‌లు ప్రారంభంకానుండగా.. తొలిరోజే చెన్నై టీమ్ తన మొదటి మ్యాచ్‌ని డిఫెండింగ్ ఛాంపియన్‌ గుజరాత్ టైటాన్స్‌తో ఆడనుంది. కానీ.. ఈ మ్యాచ్‌తో పాటు సీజన్ ఫస్ట్ హాఫ్ మ్యాచ్‌ల్లో చెన్నై ఆల్‌రౌండర్ బెన్‌స్టోక్స్ (Ben Stokes) బౌలింగ్ చేయడట. ఈ విషయాన్ని చెన్నై టీమ్ బ్యాటింగ్ కోచ్ మైకేల్ హస్సీ ధ్రువీకరించాడు. వాస్తవానికి ఐపీఎల్ 2023 సీజన్ వేలంలో బెన్‌స్టోక్స్ కోసం అన్ని ఫ్రాంఛైజీలతో పోటీపడిన చెన్నై సూపర్ కింగ్స్ రూ.16.25 కోట్లకి సొంతం చేసుకుంది. ఇంగ్లాండ్ టీమ్ టెస్టు కెప్టెన్‌గా ఉన్న బెన్‌స్టోక్స్.. బ్యాటింగ్, బౌలింగ్‌తో టీమ్‌కి ఆల్‌రౌండర్‌గా ఉపయోగపడతాడని ఆశించే చెన్నై ఫ్రాంఛైజీ ఆ మేరకు రూ. కోట్లు కుమ్మరించింది. కానీ.. ఐపీఎల్ 2023 ఫస్ట్ హాఫ్ మొత్తం కేవలం బ్యాటర్‌గానే బెన్‌స్టోక్స్ ఆడబోతున్నట్లు హస్సీ స్పష్టం చేశాడు.

‘‘నాకు తెలిసినంత వరకు బెన్‌స్టోక్స్ కేవలం బ్యాటర్‌గానే సీజన్ ఫస్ట్ హాఫ్ మ్యాచ్‌లు ఆడతాడు. మోచేతి గాయం కారణంగా అతను బౌలింగ్ చేయాలంటే కాస్త టైమ్ పడుతుంది. రెండు రోజుల క్రితం అతను నెట్స్‌లో కొద్దిసేపు మాత్రమే బౌలింగ్ చేశాడు. దానికి కూడా ఇంజెక్షన్స్ తీసుకోవాల్సి వచ్చింది. కాబట్టి.. అతను బౌలింగ్ చేయాలంటే కొన్ని వారాలు సమయం పట్టే అవకాశం ఉంది’’ అని హస్సీ వెల్లడించాడు.

ఐపీఎల్‌లో ఇప్పటి వరకు 43 మ్యాచ్‌లాడిన బెన్‌స్టోక్స్ 920 పరుగులు చేశాడు. అలానే 28 వికెట్లు కూడా పడగొట్టిన బెన్‌స్టోక్స్.. మిడిల్, డెత్ ఓవర్లలో బౌలింగ్ చేయగలడు. ఇంగ్లాండ్ టీ20, వన్డే జట్టుకి ఆడే సమయంలో డెత్ ఓవర్లలో బౌలింగ్ చేసిన అనుభవం బెన్‌స్టోక్స్‌కి ఉంది. దాంతో చెన్నై ఫ్రాంఛైజీ గంపెడాశలతో అతడ్ని కొనుగోలు చేసింది. కానీ.. నిరాశ తప్పేలా కనిపించడం లేదు.

Read Latest Sports News, Cricket News, Telugu News