IPL 2020: నితీశ్ రాణా 6, 6, 6.. అతనికే 4, 4, 4తో లెక్క సరిచేసిన రాయుడు

ఐపీఎల్ 2020 సీజన్‌లో కోల్‌కతా నైట్‌రైడర్స్ ఓపెనర్ నితీశ్ రాణా నిలకడగా రాణిస్తున్నాడు. చెన్నై సూపర్ కింగ్స్‌తో దుబాయ్ వేదికగా గురువారం రాత్రి జరిగిన మ్యాచ్‌లో ఆరంభం నుంచి దూకుడుగా ఆడిన నితీశ్ రాణా (87: 61 బంతుల్లో 10X4, 4X6) హాఫ్ సెంచరీ బాదడంతో మొదట బ్యాటింగ్ చేసిన కోల్‌కతా టీమ్ 5 వికెట్ల నష్టానికి 172 పరుగులు చేసింది. అయితే.. లక్ష్యాన్ని చివరి బంతికి ఛేదించిన చెన్నై టీమ్ ఆరు వికెట్ల తేడాతో విజయాన్ని అందుకుంది.

మ్యాచ్‌లో హాఫ్ సెంచరీ తర్వాత బ్యాట్ ఝళిపించిన నితీశ్ రాణా.. చెన్నై సీనియర్ స్పిన్నర్ కర్ణ్ శర్మ వేసిన ఓ ఓవర్‌లో వరుసగా 6, 6, 6 బాదేశాడు. ఇన్నింగ్స్ 16వ ఓవర్‌లో కర్ణ్ శర్మ బౌలింగ్‌‌కిరాగా.. అప్పటి వరకూ మూడు ఓవర్లు వేసిన అతను 16 పరుగులు మాత్రమే ఇచ్చాడు. కానీ.. తన చివరి ఓవర్‌లో నితీశ్ రాణా దెబ్బకి 19 పరుగులు సమర్పించుకున్నాడు. ఆ ఓవర్‌లో తొలి బంతిని మిడ్‌ వికెట్ దిశగా సిక్స్ కొట్టిన రాణా, రెండో బంతిని స్వ్కేర్‌ లెగ్‌‌లో మూడో బంతిని లాంగాన్ దిశగా సిక్సర్లుగా మలిచేశాడు. నాలుగో బంతికి కూడా భారీ షాట్‌కి ప్రయత్నించగా.. బంతి వైడ్‌ లైన్‌కి సమీపంలో వెళ్లింది. రాణా సిక్సర్లతో అభిమానులకి కాసేపు యువరాజ్ సింగ్ గుర్తొచ్చాడు.

ఛేదన సమయంలో ఇన్నింగ్స్ 10వ ఓవర్‌ బౌలింగ్‌ కోసం నితీశ్ రాణా చేతికి కోల్‌కతా కెప్టెన్ ఇయాన్ మోర్గాన్ సాహసోపేతంగా బంతినిచ్చాడు. ఆ ఓవర్‌లో రాయుడు అతని బౌలింగ్‌‌ని రాయుడు ఓ ఆట ఆడుకున్నాడు. ఏమాత్రం వేరియేషన్‌ లేని అతని బౌలింగ్‌లో వరుసగా మూడు బంతుల్ని 4, 4, 4గా రాయుడు మలిచేశాడు. మొత్తంగా ఆ ఓవర్‌లో చెన్నై 16 పరుగులు పిండుకుంది. ఆ తర్వాత మళ్లీ రాణా బౌలింగ్‌కి రాలేదు. తాజా సీజన్‌లో రాణా వేసిన తొలి ఓవర్ అదే. బహుశా ఆఖరి ఓవర్ కూడా ఇదే కావొచ్చు.