Dhoni Hattrick Sixes: ఆఖరి ఓవర్లో వరుస సిక్స్‌లు.. అంతుపట్టని ధోనీ లాజిక్..!

చెన్నై సూపర్ కింగ్స్‌తో జరిగిన మ్యాచ్‌లో రాజస్థాన్ రాయల్స్ 16 పరుగుల తేడాతో విజయం సాధించిన సంగతి తెలిసిందే. పీయూష్ చావ్లా రెండు ఓవర్లలో 47 పరుగులు ఇవ్వడంతోపాటు.. లుంగీ ఎంగీడి ఆఖరి ఓవర్లో 30 రన్స్ ఇవ్వడం చెన్నై అవకాశాలను దెబ్బతీసింది. రాయుడు జట్టులో లేకపోవడం.. ధోనీ ఏడో స్థానంలో బ్యాటింగ్‌కు దిగి.. ఆఖరి ఓవర్ వరకు బ్యాట్ ఝులిపించకపోవడంతో.. సూపర్ కింగ్స్ ఓటమి దిశగా పయనించింది.

చెన్నై సూపర్ కింగ్స్ విజయానికి 38 బంతుల్లో 103 పరుగులు అవసరమైన దశలో ధోనీ క్రీజ్‌లోకి వచ్చాడు. ఆ సమయంలో డుప్లెసిస్ 18 బంతుల్లో 17 పరుగులు మాత్రమే చేశాడు. రిక్వైర్డ్ రన్‌రేట్ పెరిగిపోవడంతో 15వ ఓవర్‌ నుంచి డుప్లెసిస్ గేర్ మార్చాడు. సిక్సర్లతో చెలరేగి 29 బంతుల్లోనే హాఫ్ సెంచరీ పూర్తి చేసుకున్నాడు. కానీ ఈ దశలో డుప్లెసిస్‌ (37 బంతుల్లో 72)కు ధోనీ నుంచి సరైన సహకారం అందలేదు. ధోనీ క్రీజ్‌లోకి వచ్చాకే డుప్లెసిస్ 7 సిక్సులు కొట్టగా.. ధోనీ 12 బంతుల్లో 9 రన్స్ మాత్రమే చేశాడు.
సాధించాల్సిన రన్ రేట్ కొండలా పెరిగిపోతుండటంతో.. ఒత్తిడికి గురైన డుప్లెసిస్ 19వ ఓవర్ చివర్లో ఔటయ్యాడు. దీంతో ఆఖరి ఓవర్లో చెన్నై విజయానికి 38 రన్స్ అవసరం కావడంతో.. ధోనీ సేన ఓటమి ఖరారైంది. అప్పటి వరకూ సింగిల్స్ తీయడానికే పరిమితమైన ధోనీ.. ఆఖరి ఓవర్లో మాత్రం వరుసగా మూడు సిక్స్‌లు కొట్టి ఫ్యాన్స్‌ను అలరించాడు.
ధోనీ కాస్త ముందుగా హిట్టింగ్ ప్రారంభించి ఉంటే చెన్నై గెలిచి ఉండేదని.. ఓటమి తప్పదని తేలిన తర్వాత మూడు సిక్సులు కొడితే ప్రయోజనం ఏంటని గంభీర్ సహా.. కొందరు ప్రశ్నిస్తున్నారు. కానీ ధోనీ ఫ్యాన్స్ మాత్రం.. మ్యాచ్ ఓడితే ఓడాం కానీ ఆఖర్లో తలైవా హ్యాట్రిక్స్ సిక్స్‌లు బాదాడు. మాకు అది చాలంటూ.. ఆనందం వ్యక్తం చేస్తున్నారు.
‘‘టోర్నమెంట్ ఆరంభ దశలోనే ఉండటంతో సామ్, జడేజాను బ్యాటింగ్ ఆర్డర్‌లో ముందుకు పంపి చూడాలనుకున్నాం. ఒకవేళ వీరు క్లిక్ కాకపోతే తర్వాతి దశలో.. చివర్లో ఎవరు ఆడగలరో మాకు తెలుసు. చాలా కాలంగా నేను బ్యాట్ పట్టలేదు. 14 రోజుల క్వారంటైన్‌ కూడా నాకు ఉపయోగపడలేదు’’ అని మ్యాచ్ ముగిసిన అనంతరం ధోనీ వ్యాఖ్యానించాడు.