భారత జట్టులో సన్‌రైజర్స్ బౌలర్ నటరాజన్‌.. వార్నర్ సందేశం

యార్కర్ల స్పెషలిస్ట్ నటరాజన్‌కు సన్‌రైజర్స్ కెప్టెన్ డేవిడ్ వార్నర్ కంగ్రాట్స్ చెప్పాడు. ఆస్ట్రేలియా పర్యటనకు ప్రకటించిన భారత టీ20 జట్టుకు ఎంపికైన వరుణ్ చక్రవర్తికి రీప్లేస్‌మెంట్‌గా నటరాజన్‌ను ప్రకటించారు. వరుణ్ చక్రవర్తి భుజానికి గాయం కావడంతో సెలక్టర్లు ఈ నిర్ణయం తీసుకున్నారు. ‘కంగ్రాచ్యులేషన్స్ నట్టూ.. ఆస్ట్రేలియాలో కలుద్దాం’’ అని తన జట్టు సభ్యుణ్ని అభినందిస్తూ వార్నర్ మాట్లాడిన వీడియోను సన్‌రైజర్స్ హైదరాబాద్ షేర్ చేసింది.

ఈ సీజన్లో బరిలో సన్‌రైజర్స్ తరఫున 16 మ్యాచ్‌ల్లో బరిలో దిగిన నటరాజన్... 31.50 యావరేజ్, 8.02 ఎకానమీతో 16 వికెట్లు పడగొట్టాడు. డెత్ ఓవర్లలో యార్కర్లతో ప్రత్యర్థి బ్యాట్స్‌మెన్‌ను హడలెత్తించాడు. ఆర్సీబీతో జరిగిన ఎలిమినేటర్ మ్యాచ్‌లో ఏబీ డివిలియర్స్‌ను ఔట్ చేయడం కోసం అతడు సంధించిన యార్కర్‌ను ఫ్యాన్స్ ఎప్పటికీ మర్చిపోలేరు.

తొలిసారి భారత జట్టుకు ఎంపికైన నటరాజన్‌ను మాజీ ఆల్‌రౌండర్ ఇర్ఫాన్ పఠాన్ అభినందించాడు. ‘కష్టపడి పని చేయడం, ఎప్పటికీ ఆశలను వదులుకోకపోవడమే నటరాజన్‌ స్టోరీ. తొలిసారి టీమిండియాకు ఎంపికైనందుకు కంగ్రాట్స్ బడ్డీ’ అని పఠాన్ ట్వీట్ చేశాడు.