Best catch of IPL 2019: బౌండరీ లైన్‌పై ‘క్రిస్‌గేల్‌’ క్యాచ్‌తో ఆట..!

ఐపీఎల్ 2019 సీజన్‌లో బ్యాటింగ్, బౌలింగ్‌లోనే కాదు.. ఫీల్డింగ్‌లోనూ ఆటగాళ్లు సమయస్ఫూర్తితో వ్యవహరిస్తూ ప్రశంసలు అందుకుంటున్నారు. కింగ్స్ ఎలెవన్ పంజాబ్‌తో ఫిరోజ్ షా కోట్ల వేదికగా శనివారం రాత్రి జరిగిన మ్యాచ్‌లో ఢిల్లీ క్యాపిటల్స్ ఫీల్డర్ కొలిన్ ఇంగ్రామ్ బౌండరీ లైన్ వద్ద అందుకున్న క్యాచ్ ఇప్పుడు అందర్నీ ఆశ్చర్యపరుస్తోంది.

మ్యాచ్‌లో ఇన్నింగ్స్ 13వ ఓవర్ వేసిన ఢిల్లీ స్పిన్నర్ లమిచానే బౌలింగ్‌లో పంజాబ్ ఓపెనర్ క్రిస్‌గేల్ (69: 37 బంతుల్లో 6x4, 5x6) భారీ షాట్ ఆడాడు. గాల్లోకి ఎక్కువ ఎత్తులో వెళ్లిన బంతి బౌండరీ లైన్‌కి అవల పడేలా కనిపించింది. కానీ.. బౌండరీ లైన్ వద్ద తెలివిగా దాన్ని అందుకున్న ఇంగ్రామ్.. తనని తాను నియంత్రించుకోలేకపోయాడు.

కానీ.. ఇంగ్రామ్ బౌండరీ లైన్‌పై పడిపోతూనే సమయస్ఫూర్తితో బంతిని సమీపంలో ఉన్న మరో ఫీల్డర్ అక్షర్‌ పటేల్‌ వైపు విసిరాడు. అప్పటికే బంతి గమనాన్ని పరిశీలిస్తూ వచ్చిన అక్షర్‌ తనవైపు వచ్చిన బంతిని చక్కగా అందుకోవడంతో క్రిస్‌గేల్‌కి నిరాశగా తప్పలేదు. వాస్తవానికి ఐపీఎల్‌లో ఇలా బౌండరీ లైన్ వద్ద ఫీల్డర్లు క్యాచ్‌లు అందుకోవడం మామూలే. కానీ.. తాజా సీజన్‌లో మాత్రం ఇదే మొదటిది.