IPL 2020: CSKతో మ్యాచ్ ముంగిట DC‌కి గుడ్‌న్యూస్..!

ఐపీఎల్ 2020 సీజన్‌‌లో ఢిల్లీ క్యాపిటల్స్‌కి ఉత్సాహానిచ్చే వార్త. దుబాయ్ వేదికగా శుక్రవారం రాత్రి 7.30 గంటలకి ఆ జట్టు చెన్నై సూపర్ కింగ్స్‌తో తలపడనుండగా.. గత ఆదివారం కింగ్స్ ఎలెవన్ పంజాబ్‌తో మ్యాచ్‌ ఆడుతూ గాయపడిన సీనియర్ స్పిన్నర్ రవిచంద్రన్ అశ్విన్ పూర్తిగా ఫిట్‌నెస్ సాధించాడు. ఈ మేరకు ఈరోజు ఒక వీడియోని విడుదల చేసిన అశ్విన్.. రాత్రి మ్యాచ్‌లో ఆడబోతున్నట్లు సంకేతాలిచ్చాడు.


దుబాయ్ వేదికగా గత ఆదివారం పంజాబ్, ఢిల్లీ మధ్య మ్యాచ్ జరగగా.. ఆ మ్యాచ్‌లో ఒకే ఒక ఓవర్‌ బౌలింగ్ చేసిన అశ్విన్.. కరుణ్ నాయర్, నికోలస్ పూరన్ వికెట్లు పడగొట్టాడు. అదే ఓవర్ చివరి బంతికి మాక్స్‌వెల్‌ హిట్ చేసిన బంతిని అడ్డుకునేందుకు అశ్విన్ డైవ్ చేయగా.. అతని ఎడమ భుజం స్థానభ్రంశమైంది. దాంతో.. ఫిజియో సూచన మేరకు వెంటనే మైదానం వీడిన అశ్విన్.. మళ్లీ గ్రౌండ్‌లోకి అడుగుపెట్టలేదు. మధ్యలో చేతికి పట్టీతో అతను ఢిల్లీ డ్రెస్సింగ్ రూములో కనిపించాడు. ఆఖరి బంతి వరకూ ఉత్కంఠగా జరిగిన ఆ మ్యాచ్‌‌లో చివరికి స్కోర్లు సమమవగా.. సూపర్ ఓవర్‌లో ఢిల్లీ గెలుపొందింది.


ఐపీఎల్‌లో ఇప్పటి వరకూ 140 మ్యాచ్‌లాడిన అశ్విన్ 127 వికెట్లు పడగొట్టాడు. మొదటి పవర్‌ ప్లేలోనే కాకుండా డెత్ ఓవర్లలోనూ పొదుపుగా బౌలింగ్ చేయగల సామర్థ్యం ఉన్న అశ్విన్‌ని మిడిల్ ఓవర్లలో ఏదైనా భాగస్వామ్యాన్ని విడదీసేందుకు కెప్టెన్లు వినియోగిస్తుంటారు.