KXIP: ‘రాహుల్ కెప్టెన్‌గా ఎదిగాడు.. పంజాబ్ విజయాల క్రెడిట్ కుంబ్లేదే’

ఐపీఎల్ 2020లో ఆరంభ మ్యాచ్‌ల్లో వరుసగా ఓడిన కింగ్స్ ఎలెవన్ పంజాబ్.. మలి దశలో అద్భుతంగా పుంజుకుంది. తొలి దశలో గెలవాల్సిన మ్యాచ్‌ల్లో ఓడి నిరాశపర్చిన పంజాబ్... ఐపీఎల్ కీలక దశకు చేరిన తర్వాత.. ఓటమి తప్పదనుకున్న మ్యాచ్‌ల్లోనూ అద్భుత పోరాటంతో విజయాలను సాధించింది. కింగ్స్ ఎలెవన్ పంజాబ్ ఆకట్టుకునే ప్రదర్శన పట్ల దిగ్గజ క్రికెటర్, కామెంటేటర్ సునీల్ గావస్కర్ స్పందించారు.

కేఎల్ రాహుల్ కెప్టెన్సీతోపాటు.. కోచ్ అనిల్ కుంబ్లే పోరాడేతత్వం కారణంగా పంజాబ్ రాత మారిందని గావస్కర్ అభిప్రాయపడ్డారు. వరుసగా ఐదు మ్యాచ్‌ల్లో ఓడిన పంజాబ్.. ఆ తర్వాత అద్భుతంగా పుంజుకుంది. నాలుగు వరుస విజయాలతో 10 పాయింట్లను సాధించి పాయింట్ల పట్టికలో ఐదో స్థానంలో నిలిచింది. మరో మూడు మ్యాచ్‌ల్లోనూ ఇదే తరహా ఆటతీరు కనబరిస్తే.. ఆ జట్టు ఫ్లేఆఫ్ చేరే అవకాశాలున్నాయి.

‘గెలిచే దారిని వారు కనుగొన్నారు. టోర్నీ ఆరంభంలో వారు విజయాలను సాధించలేకపోయారు. ప్రతిసారి విజయానికి చేరువగా వచ్చి ఓడారు. తొలి మ్యాచ్‌లో సూపర్ ఓవర్లో ఓడారు. తర్వాత చివరి ఓవర్లలో పరాజయం పాలయ్యారు’ అని గావస్కర్ తెలిపారు.

‘గత కొన్ని మ్యాచ్‌ల్లో వారు అద్భుతంగా ఆడారు. శనివారం సన్‌రైజర్స్‌తో జరిగిన మ్యాచ్‌లో 126 పరుగులే చేసిన పంజాబ్ 12 పరుగుల తేడాతో విజయం సాధించడం సంచలనం. పంజాబ్ ఆటగాళ్లు తమను తాము బలంగా నమ్మారు. జట్టును రాహుల్ అద్భుతంగా ముందుకు నడిపిస్తున్నాడు. కెప్టెన్‌గా రాహుల్ ఎదిగాడు. ఫీల్డింగ్ సెట్ చేయడంలో, బౌలింగ్ మార్పు విషయంలో.. రాహుల్ రాటుదేలాడు’ అని గావస్కర్ ప్రశంసలు గుప్పించాడు.

‘పంజాబ్ విజయాల్లో అనిల్ కుంబ్లే పాత్రను మరవొద్దు. క్రికెట్ కెరీర్ మొత్తం అతడు పోరాడాడు. దవడకు దెబ్బతగిలినా వెస్టిండీస్‌తో మ్యాచ్‌లో అతడు బరిలోకి దిగాడు. అదే ధీరత్వం కింగ్స్ ఎలెవన్ పంజాబ్‌లో కనిపిస్తోంద’ని గావస్కర్ కొనియాడాడు. వీరిద్దరి వల్లే అసాద్యమనుకున్న పరిస్థితుల్లో పంజాబ్ పుంజుకుందని.. ప్లేఆఫ్స్ రేసులోనూ నిలిచిందని రాహుల్, కుంబ్లేను గావస్కర్ ప్రశంసించాడు.