Umran Malik: ప్రమాదంలో మాలిక్‌ కెరీర్..? SRH మేనేజ్‌మెంట్‌పై మాజీల ఆగ్రహం!

గత ఐపీఎల్ సీజన్లో ఉమ్రాన్ మాలిక్ అదరగొట్టే ప్రదర్శన చేశాడు. 14 మ్యాచ్‌ల్లో 22 వికెట్లు తీసి సత్తా చాటాడు. గంటకు 150 కిలోమీటర్ల వేగంతో బౌలింగ్ చేసే మాలిక్.. ప్రత్యర్థి బ్యాటర్లకు చెమటలు పట్టించాడు. దీంతో టీమిండియాకు మరో స్పీడ్ ‌స్టర్ దొరికాడని భావించారంతా. మాలిక్‌ ప్రతిభకు మరింత మెరుగుపెడితే.. భారత జట్టుకు ఓ ఆయుధంలా మారతాడని భావించారు. గత ఏడాది జూన్‌లో ఐర్లాండ్‌తో జరిగిన టీ20 మ్యాచ్‌లో అరంగేట్రం చేశాడు కూడా. ఈ సీజన్లో ఉమ్రాన్ ఆకట్టుకోలేకపోయాడు. ఏడు మ్యాచ్‌‌లు ఆడిన మాలిక్ 5 వికెట్లు మాత్రమే తీయగలిగాడు. 10.35 ఎకానమీతో పరుగులిచ్చాడు. తాను ఆడిన చివరి మూడు మ్యాచ్‌ల్లో ఒక్క వికెట్ కూడా తీయలేకపోయాడు. ఢిల్లీతో జరిగిన మ్యాచ్‌లో ఒక ఓవర్ బౌలింగ్ చేసి 22 రన్స్ ఇచ్చాడు. దీంతో అతడికి మళ్లీ బౌలింగ్ ఇవ్వలేదు. ఫామ్‌లో లేడనే కారణంతో అతడికి మళ్లీ ఆడే అవకాశం ఇవ్వలేదు.

ఆరు మ్యాచ్‌లపాటు ఉమ్రాన్ మాలిక్‌ను ఆడించకుండా.. బెంచీకే పరిమితం చేయడంతో.. సన్‌‌రైజర్స్ కెప్టెన్ అయిడిన్ మార్‌క్రమ్‌ను మీడియా ఈ విషయమై ప్రశ్నించింది. 150 కి.మీ. వేగంతో బౌలింగ్ చేసే మాలిక్ ఎక్స్ ఫ్యాక్టర్‌లా ఉపయోగపడతాడన్న మార్‌క్రమ్.. వెనుక ఏం జరుగుతుందో తనకు నిజంగా తెలియదని బదులిచ్చాడు. దీంతో సన్‌రైజర్స్ మేనేజ్‌మెంట్ ఉమ్రాన్ మాలిక్ విషయంలో సరిగా వ్యవహరించడం లేదని జహీర్ ఖాన్, ఇర్ఫాన్ ఖాన్ లాంటి మాజీ క్రికెటర్లు అభిప్రాయపడుతున్నారు.
‘ఉమ్రాన్ మాలిక్‌ సేవలను వాడుకుంటున్న తీరును చూస్తుంటే.. కశ్మీరీ పేసర్‌‌ను ఫ్రాంచైజీ సరిగా హ్యాండిల్ చేయడం లేదనిపిస్తోంద’ని జహీర్ ఖాన్ అభిప్రాయపడ్డాడు. ‘యువ పేసర్ ఎదగడానికి మంచి సహకారం లభించాలి. జట్టులో మంచి వాతావరణం ఉండాలి. అతడికి మంచి గైడెన్స్ అవసరం. కానీ సన్‌రైజర్స్‌ మేనేజ్‌మెంట్ నుంచి అలాంటిది కనిపించలేదు’’ అని జహీర్ వ్యాఖ్యానించాడు.
అంతకు ముందు టీమిండియా మాజీ ఆల్‌రౌండర్ ఇర్ఫాన్ పఠాన్ సైతం ఇదే విధంగా అభిప్రాయపడ్డాడు. లీగ్‌లోనే ఫాస్టెస్ట్ బౌలర్ బెంచీకే పరిమితం కావడం తనను కలవరానికి గురి చేస్తోందని ఇర్ఫాన్ ట్వీట్ చేశాడు. ఉమ్రాన్ మాలిక్‌ను అతడి జట్టు సరిగా హ్యాండిల్ చేయలేదంటూ పఠాన్ ఘాటుగానే ట్వీట్ చేశాడు.
‘‘తెర వెనుక ఏం జరుగుతుందో నాకు తెలీదు.. అని కెప్టెన్ చెప్పడం చింతించాల్సిన విషయం. ఉమ్రాన్ మాలిక్‌కు ఒక్క మ్యాచ్‌లోనూ అవకాశం రాకపోవడం నన్ను కలవరానికి గురి చేసింది’’ అని కామెంటేటర్ హర్షా భోగ్లే ట్వీట్ చేశాడు. దీనికి నెటిజన్లు స్పందిస్తూ.. సన్‌రైజర్స్ మేనేజ్‌మెంట్ ఎవరిని సరిగా హ్యాండిల్ చేసిందో చెప్పండి? అని ప్రశ్నిస్తున్నారు.

‘‘లాస్ట్ ఇయర్ ఉమ్రాన్ చాలా మంచి ప్రదర్శన చేశాడు. ఆ మీరు క్రెడిట్ తీసుకున్నారు. ఈ ఏడాది అతడికి మీ సపోర్ట్ అవసరం. కానీ అతడికి అండగా నిలిచారా..? అతణ్ని సరిగా వాడుకున్నారా..? అతడు యువ బౌలర్. భారత జట్టు భవిష్యత్తు అతడు. టీమిండియా తరఫున కూడా బాగా ఆడాడు. అతణ్ని మీరు సరిగా ఉపయోగించుకోలేదు. ఫ్రాంచైజీలోని మిగతా ఆటగాళ్ల విషయంలోనూ ఇదే చెప్పొచ్చు. ప్రత్యర్థి మైండ్‌తో ఆడుకోండి.. మీ సొంత ఆటగాళ్లతో కాదు’’ అంటూ సన్‌రైజర్స్ మేనేజ్‌మెంట్‌ను ఉద్దేశించి యూసుఫ్ పఠాన్ ఘాటైన వ్యాఖ్యలు చేశాడు.