SRH: ఐదుగురు ఆటగాళ్లను రిలీజ్ చేసిన సన్‌రైజర్స్.. వ్యూహాత్మకమా? అతి జాగ్రత్తా?

ఐపీఎల్ 2021కు ముందు మినీ వేలం నిర్వహించనుండగా.. ఫ్రాంచైజీలు తమకు అవసరం లేదనుకున్న ఆటగాళ్లను రిలీజ్ చేశాయి. కాగా సన్‌రైజర్స్ హైదరాబాద్ జట్టు కోర్ టీం అలాగే కొనసాగించాలని నిర్ణయించింది. జట్టులో ప్రధాన ఆటగాళ్లందర్నీ రిటైన్ చేసుకుంది. విదేశీ ఆటగాళ్లయిన ఫ్యాబియెన్ అలెన్, బిల్లీ స్టాన్‌లేక్‌లను సన్‌రైజర్స్ రిలీజ్ చేసింది. గత సీజన్లో వీరికి ఒక్క మ్యాచ్‌లోనూ ఆడే అవకాశం లభించలేదు.

దేశీయ అండర్ క్యాప్ ఆటగాళ్లలో సంజయ్ యాదవ్, బవనాక సందీప్, పృథ్వీ రాజ్‌లను ఆరెంజ్ ఆర్మీ రిలీజ్ చేసింది. గత సీజన్లో నెట్ బౌలర్‌గా జట్టులోకి చేరిన పృథ్వీ రాజ్.. భువీ సహా ఇతర బౌలర్లు గాయపడటంతో.. సన్‌రైజర్స్ జట్టులోకి తీసుకున్న సంగతి తెలిసిందే.

కెప్టెన్ డేవిడ్ వార్నర్, కేన్ విలియమ్సన్‌తోపాటు వికెట్ కీపర్ జానీ బెయిర్‌స్టోను సైతం సన్‌రైజర్స్ రిటైన్ చేసుకుంది. మనీష్ పాండే, విజయ్ శంకర్‌తోపాటు గత సీజన్లో చెన్నై సూపర్ కింగ్స్‌పై జట్టును గెలిపించిన ప్రియమ్ గార్గ్‌ను సైతం అట్టిపెట్టుకుంది. విరాట్ సింగ్, అబ్దుల్ సమద్ లాంటి యువ హిట్టర్లను రిటైన్ చేసుకుంది. వికెట్ కీపర్లు సాహా, గోస్వామి సైతం జట్టులో ఉండనున్నారు.

ఐపీఎల్ 2020లో తొలి మ్యాచ్‌లోనే గాయపడిన మిచెల్ మార్ష్ స్థానంలో జట్టులోకి తీసుకున్న జేసన్ హోల్డర్‌ను సైతం ఆరెంజ్ ఆర్మీ అట్టిపెట్టుకుంది. గత సీజన్లో ఒక్క మ్యాచ్‌ మాత్రమే ఆడిన అప్ఘాన్ స్పిన్ ఆల్‌రౌండర్ మహ్మద్ నబీని సైతం రిటైన్ చేసుకుంది. దీంతో జట్టులో హోల్డర్, నబీతోపాటు.. విజయ్ శంకర్, మార్ష్, అభిషేక్ శర్మ, అబ్దుల్ సమద్ లాంటి ఆల్‌రౌండర్లు ఉన్నారు.

బౌలింగ్ విభాగంలో భువీ, నటరాజన్, సందీప్ శర్మ, ఖలీల్ అహ్మద్, సిద్ధార్థ్ కౌల్, బేసిల్ థంపీ, నదీమ్‌తోపాటు.. స్పిన్ తురుపుముక్క రషీద్ ఖాన్‌ను సైతం సన్‌రైజర్స్ రిటైన్ చేసుకుంది.

ప్రస్తుతం సన్‌రైజర్స్ దగ్గర రూ.10.75 కోట్ల పర్సు మనీ ఉండగా.. వేలంలో ఇద్దరు విదేశీ ఆటగాళ్లు, ముగ్గురు భారత క్రికెటర్లను జట్టులోకి తీసుకునే అవకాశం ఆరెంజ్ ఆర్మీకి ఉంది.