IPL 2023 ముంగిట ఆర్సీబీ టీమ్‌కి షాక్.. పవర్ హిట్టర్ కొన్ని మ్యాచ్‌లకి డౌట్!

ఐపీఎల్ 2023 (IPL 2023) ముంగిట రాయల్ ఛాలెంజర్స్ బెంగళూరు (RCB) టీమ్ అభిమానులకి షాకిచ్చే వార్త. ఆర్సీబీ పవర్ హిట్టర్ గ్లెన్ మాక్స్‌వెల్ (Glenn Maxwell) తాను 100% ఫిట్‌గా లేనట్లు తాజాగా ప్రకటించాడు. ఎడమ కాలి గాయానికి గత ఏడాది సర్జరీ చేయించుకున్నఈ ఆస్ట్రేలియా క్రికెటర్ కొన్ని నెలల పాటు ఆటకి దూరంగా ఉన్నాడు. ఇటీవల భారత్, ఆస్ట్రేలియా మధ్య ముగిసిన మూడు వన్డేల సిరీస్‌తో టీమ్‌లోకి రీఎంట్రీ ఇచ్చినా.. ఒక్క మ్యాచ్‌లో మాత్రమే ఆడాడు. అది కూడా తొలి వన్డేలో కావడంతో అతను మళ్లీ గాయపడ్డాడేమో? అనే సందేహాలు వ్యక్తమయ్యాయి. మార్చి 31 నుంచి ఐపీఎల్ 2023 మ్యాచ్‌లు ప్రారంభంకానున్నాయి. ఈ నేపథ్యంలో ఇప్పటికే బెంగళూరులోని చిన్నస్వామి స్టేడియంలో ఆర్సీబీ టీమ్ ప్రాక్టీస్ కూడా మొదలెట్టేసింది. మాజీ కెప్టెన్ విరాట్ కోహ్లీతో పాటు సీనియర్ ప్లేయర్లు కూడా శనివారం బెంగళూరుకి చేరుకున్నట్లు తెలుస్తోంది. ఆర్సీబీ టీమ్‌కి సుదీర్ఘకాలం ఆడిన ఏబీ డివిలియర్స్, క్రిస్‌గేల్‌ని హాఫ్ ఆఫ్ ఫేమ్‌లో ఆ జట్టు ఫ్రాంఛైజీ చేర్చబోతోంది. అలానే వారి జెర్సీ నెంబర్లు 17, 333కి కూడా రిటైర్మెంట్ ఇవ్వబోతోంది. దాంతో ఈ ఇద్దరితో పాటు ఈరోజు విరాట్ కోహ్లీ కూడా బెంగళూరుకి చేరుకున్నాడు.

బెంగళూరు టీమ్ ప్రాక్టీస్ సెషన్‌లో ఉన్న గ్లెన్ మాక్స్‌వెల్ తన ఫిట్‌నెస్‌పై క్లారిటీ ఇచ్చాడు. ‘‘నాకు కాలు ఇప్పుడు బాగుంది. కానీ 100% ఫిట్‌నెస్ సాధించాలంటే మరికొన్ని నెలల సమయం పడుతుంది. ఈసారి టోర్నీ మొత్తం ఆడేందుకు ప్రయత్నిస్తా’’ అని గ్లెన్ మాక్స్‌వెల్ చెప్పుకొచ్చాడు. పేలవ ఫిట్‌నెస్ కారణంగా గత కొన్ని సీజన్లుగా అన్ని మ్యాచ్‌ల్లో గ్లెన్ మాక్స్‌వెల్ ఆడలేకపోతున్నాడు.

Read Latest Sports News, Cricket News, Telugu News