నిజమైన ‘గ్రీన్’ సెంటిమెంట్.. ఫైనల్ చేరకుండానే నిష్క్రమించిన ఆర్సీబీ

ఐపీఎల్‌లో మరోసారి ఆర్సీబీ సెంటిమెంట్ నిజమైంది. గ్రీన్ జెర్సీతో ఆడిన మ్యాచ్‌లో ఓడిన సీజన్లో.. ఆర్సీబీ ఫైనల్ చేరదని మరోసారి రుజువైంది. 2011 నుంచి ప్రతి ఐపీఎల్ సీజన్లో ఒక మ్యాచ్‌లో బెంగళూరు గ్రీన్ జెర్సీ ధరించి మ్యాచ్‌లు ఆడుతోంది. కానీ గ్రీన్ జెర్సీ ధరించి ఆడిన సందర్భాల్లో ఇప్పటి వరకూ రెండు మ్యాచ్‌ల్లోనే కోహ్లి సేన గెలుపొందింది. ఈ ఏడాది చెన్నై సూపర్ కింగ్స్‌తో జరిగిన మ్యాచ్‌లో గ్రీన్ జెర్సీతో బరిలో దిగిన రాయల్ ఛాలెంజర్స్ బెంగళూరు ఓటమిపాలైంది.

2011లో కొచ్చి టస్కర్స్‌పై.. 2016లో గుజరాత్ లయన్స్‌పై కోహ్లి సేన గ్రీన్ జెర్సీలో విజయం సాధించింది. ఈ రెండు సీజన్లలోనూ ఆర్సీబీ ఫైనల్ చేరడం విశేషం. ఈ ఏడాది ఓటమితో కోహ్లి సేన గ్రీన్ జెర్సీ మ్యాచ్‌ల్లో గెలిచిన ఏడాది ఫైనల్ చేరడం అనేది ఆర్సీబీకి సెంటిమెంట్‌గా మారింది.

ఎందుకీ గ్రీన్ జెర్సీ..?

‘గో గ్రీన్’ ఇనిషియేటివ్‌ను ప్రచారం చేయడం కోసం బెంగళూరు ఏటా గ్రీన్ జెర్సీ ధరించి ఆడుతోంది. పర్యావరణ పరిరక్షణ, మొక్కల పెంపకాన్ని ప్రోత్సహించడమే గో గ్రీన్ ధ్యేయం. రీస్లైకింగ్ గురించి అవగాహన పెంపొందించడం కూడా ఆర్సీబీ గ్రీన్ జెర్సీ లక్ష్యం. కోహ్లి సేన ధరించే గ్రీన్ జెర్సీలు రీసైక్లింగ్ చేసిన ప్లాస్టిక్‌తో రూపొందించినవి కావడం విశేషం. రెడ్యూస్ (తగ్గించడం), రీసైకిల్ (పునర్వినియోగానికి అనుకూలంగా మలవడం), రీ యూజ్ (మళ్లీ వాడటం) ద్వారా కాలుష్యాన్ని నియంత్రించొచ్చు.

Previous Article: ఆర్సీబీ గ్రీన్ సెంటిమెంట్.. ఈసారి కూడా నిజమవుతుందా..?