IPL 2020: ముంబై ఇండియన్స్ సక్సెస్ సీక్రెట్.. ఒక్కరిద్దరు కాదు ఏకంగా ఆరుగురు!

ఐపీఎల్ 2020లో అదరగొట్టే ప్రదర్శన చేసిన ముంబై ఇండియన్స్.. తిరుగులేని విజయాలతో ఫైనల్ చేరింది. లీగ్ దశలో 9 విజయాలతో పాయింట్ల పట్టికలో అగ్రస్థానంలో నిలిచిన రోహిత్ సేన.. ప్లేఆఫ్ చేరిన తొలి జట్టుగా నిలిచింది. ఈ సీజన్లో ప్రతి జట్టుపైనా విజయాలు సాధించిన ముంబై.. తొలి క్వాలిఫైయర్‌లో ఢిల్లీపై సునాయాసంగా గెలుపొందింది. ఐపీఎల్ 13 సీజన్లలో ముంబై ఇండియన్స్ ఫైనల్ చేరడం ఇది ఆరోసారి కావడం విశేషం.

ఈ సీజన్లో ముంబై జట్టు ఆల్‌రౌండర్ ప్రదర్శనతో ఆకట్టుకుంటోంది. మరే జట్టు లేనంతగా ఆ జట్టు బ్యాటింగ్, బౌలింగ్ విభాగాల్లో బలంగా ఉంది. రోహిత్ ఆకట్టుకోలేకపోయినా.. డికాక్, సూర్యకుమార్ యాదవ్, ఇషాన్ కిషన్ రాణిస్తున్నారు. ఆఖరి ఓవర్లలో పోలార్డ్ లేదా హార్దిక్ మెరుపులు మెరిపిస్తున్నారు. దీంతో మిగతా జట్లకు సాధ్యం కాని రీతిలో ఆ జట్టు భారీ స్కోర్లు చేస్తోంది. ఆ తర్వాత ముంబై బౌలర్లు చెలరేగిపోతున్నారు. బుమ్రా, బౌల్ట్ రూపంలో వరల్డ్ క్లాస్ ఫాస్ట్ బౌలర్లు ఆ జట్టులో ఉన్నారు. స్పిన్నర్ రాహుల్ చాహర్ వారికి సహకారం అందిస్తున్నాడు.

ఈ సీజన్లో ఇప్పటి వరకూ డికాక్ 483 రన్స్ చేయగా.. సూర్యకుమార్ యాదవ్ 461 రన్స్, ఇషాన్ కిషన్ 483 రన్స్‌తో సత్తా చాటారు. ఈ ముగ్గురు నిలకడగా రాణించడానికి తోడు ఆఖర్లో ముంబై ఇండియన్స్ ఇంజిన్‌గా పిలుచుకునే పోలార్డ్, పాండ్య బ్రదర్స్ చెలరేగడంతో ముంబై భారీ స్కోర్లు చేస్తోంది.

ముంబై బౌలర్లలో జస్ప్రీత్ బుమ్రా 27 వికెట్లతో పర్పుల్ క్యాప్ హోల్డర్‌గా ఉండగా.. బౌల్ట్ 22 వికెట్లతో అత్యధిక వికెట్లు తీసిన బౌలర్ల జాబితాలో మూడో స్థానంలో ఉన్నాడు. స్పిన్నర్ రాహుల్ చాహర్ 15 వికెట్లు పడగొట్టాడు. అంటే ముంబై జట్టులోని 11 మంది ఆటగాళ్లలో ఆరుగురు నిలకడగా రాణిస్తున్నారు. దీంతో ముంబై సునాయాసంగా విజయాలు సాధిస్తోంది.

రాయల్ ఛాలెంజర్స్ బెంగళూరు తరఫున ఈ సీజన్లో పడిక్కల్ (473), విరాట్ కోహ్లి (466), డివిలియర్స్ (454) కూడా 450కిపైగా రన్స్ చేసినప్పటికీ.. మరో హిట్టర్ లేకపోవడం ఆర్సీబీని దెబ్బతీసింది. బౌలింగ్‌లో చాహల్ (21) మాత్రమే టాప్ 15లో చోటు దక్కించుకున్నాడు. బెంగళూరు జట్టులో మరో హిట్టర్, వరల్డ్ క్లాస్ ఫాస్ట్ బౌలర్ ఉంటే ఆ జట్టు కూడా ముంబైలా నిలకడగా రాణించి ఉండేది.