CSK vs MI: ఇమ్రాన్ తాహిర్ అప్పర్ కట్.. నోరెళ్లబెట్టిన జస్‌ప్రీత్ బుమ్రా

ఐపీఎల్ 2020 సీజన్‌లో ఆడిన తొలి మ్యాచ్‌లోనే చెన్నై సూపర్ కింగ్స్ స్పిన్నర్ ఇమ్రాన్ తాహిర్ బౌలింగ్‌లో కాకుండా బ్యాటింగ్‌లో అదరగొట్టేశాడు. ముంబయి ఇండియన్స్‌తో షార్జా వేదికగా శుక్రవారం రాత్రి జరిగిన మ్యాచ్‌లో చెన్నై టీమ్ 14.5 ఓవర్లు ముగిసే సమయానికి 71/8తో నిలిచిన దశలో క్రీజులోకి వచ్చిన ఇమ్రాన్ తాహిర్ (13 నాటౌట్: 10 బంతుల్లో 2x4).. శామ్ కరన్‌ (52: 47 బంతుల్లో 4x4, 2x6)‌తో కలిసి ఆఖరి బంతి వరకూ క్రీజులో నిలిచాడు. టాప్ ఆర్డర్ బ్యాట్స్‌మెన్ తరహాలో తాహిర్ కొట్టిన రెండు బౌండరీలు.. అందర్నీ ఆశ్చర్యపరిచాయి.

ఇన్నింగ్స్ 19వ ఓవర్ వేసిన జస్‌ప్రీత్ బుమ్రా.. నాలుగో బంతిని బౌన్సర్ రూపంలో సంధించాడు. గంటకి 140కిమీ వేగంతో దూసుకొచ్చిన బంతిని కాస్త వెనక్కి వంగుతూ ఇమ్రాన్ తాహిర్ అప్పర్ కట్ షాట్ ఆడేశాడు. బంతి చక్కగా బ్యాట్‌కి మిడిల్ కావడంతో కీపర్ పక్క నుంచి వెళ్లిన బంతి బౌండరీ లైన్‌ని తాకింది. మ్యాచ్‌లో టాప్ ఆర్డర్ బ్యాట్స్‌మెన్‌లు కూడా బుమ్రా బౌలింగ్‌లో ఆ షాట్ ఆడే సాహసం చేయలేదు. కానీ.. ఓ బౌలర్ అదీ.. 10 మ్యాచ్‌లు వరుసగా రిజర్వ్ బెంచ్‌కి పరిమితమైన ఆటగాడు అప్పర్ కట్ ఆడటంతో బుమ్రా సైతం ఆశ్చర్యం వ్యక్తం చేశాడు.

మ్యాచ్‌లో 3 ఓవర్లు బౌలింగ్ చేసిన తాహిర్ 22 పరుగులిచ్చి.. కనీసం ఒక వికెట్ కూడా పడగొట్టలేకపోయాడు. ఐపీఎల్ 2019 సీజన్ లీగ్ దశ ముగిసే సమయానికి తాహిర్ అత్యధిక వికెట్లు పడగొట్టిన బౌలర్‌గా ఉండటం గమనార్హం.