Rinku Singhకి త్వరలోనే టీమిండియా నుంచి పిలుపు? హర్భజన్ జోస్యం

కోల్‌కతా నైట్‌రైడర్స్ (KKR) టీమ్ నయా సంచలనం రింకు సింగ్‌(Rinku Singh)కి త్వరలోనే టీమిండియా నుంచి పిలుపు రాబోతోందని భారత మాజీ క్రికెటర్ హర్భజన్ సింగ్ (Harbhajan Singh) జోస్యం చెప్పాడు. ఐపీఎల్ 2023 సీజన్ ఆరంభం నుంచి నిలకడగా రాణిస్తున్న రింకు సింగ్.. కోల్‌కతా జట్టులో ఫినిషర్ రోల్‌ని పోషిస్తున్నాడు. ఈ క్రమంలో ఇప్పటికే 11 మ్యాచ్‌‌లాడిన ఈ యంగ్ పవర్ హిట్టర్ 151.12 స్ట్రైక్‌రేట్‌తో 337 పరుగులు చేశాడు. ఇందులో రెండు హాఫ్ సెంచరీలు ఉండగా.. 56.17 సగటుతోనే అతను సత్తాచాటుతున్నాడు. రింకు సింగ్ గురించి హర్భజన్ సింగ్ మాట్లాడుతూ ‘‘రింకు సింగ్‌ హెడ్‌కి ఇండియన్ క్యాప్ ఎంతో దూరంలో లేదు. క్లిష్ట పరిస్థితులు ఎదుర్కొన్ని అతను ఈ స్థాయికి చేరుకున్నాడు. అతని జర్నీ యంగ్ క్రికెటర్స్‌కి ఓ పాఠం. తనని తాను నమ్ముకుని రింకు సింగ్ ఈ స్థాయికి చేరాడు’’ అని చెప్పుకొచ్చాడు. ఐపీఎల్ 2023 సీజన్‌లో ఓ రెండు మ్యాచ్‌ల్లో కోల్‌కతా నైట్‌రైడర్స్ టీమ్ గెలుపుపై ఆశలు వదిలేసిన దశలో రింకు సింగ్ తన హిట్టింగ్‌తో గెలిపించాడు. గత ఏడాది వరకు రింకు సింగ్‌ని కోల్‌కతా నైట్‌రైడర్స్ టీమ్ సబ్‌స్టిట్యూట్ ఫీల్డర్‌గానే ఎక్కువగా వినియోగించుకుంది. కానీ.. ప్రస్తుతం కోల్‌కతా టీమ్‌లో అతను టాప్-3 ప్లేయర్లలో ఒకడు.

ఐపీఎల్ 2023 సీజన్‌లో ఇప్పటి వరకు 11 మ్యాచ్‌లాడిన కోల్‌కతా నైట్‌రైడర్స్ టీమ్ కేవలం ఐదు మ్యాచ్‌ల్లో మాత్రమే విజయం సాధించింది. దాంతో పాయింట్ల పట్టికలోనూ ఆరో స్థానంలో కోల్‌కతా నైట్‌రైడర్స్ టీమ్ కొనసాగుతోంది. ఇక లీగ్ దశలో మిగిలిన మూడు మ్యాచ్‌లను రాజస్థాన్ రాయల్స్, చెన్నై సూపర్ కింగ్స్, లక్నో సూపర్ జెయింట్స్ జట్లతో కోల్‌కతా నైట్‌రైడర్స్ ఆడనుంది.