Rohit Sharma: రోహిత్ ఫిట్‌గా ఉన్నాడు.. ఇది గ్రేట్ న్యూస్, అవన్నీ అనవసరం: సన్నీ

రోహిత్ శర్మ ఫిట్‌నెస్ అంశం ఇప్పుడు క్రికెట్ వర్గాల్లో హాట్ టాపిక్‌గా మారింది. గాయం కారణంగానే రోహిత్‌ను ఆస్ట్రేలియా పర్యటనకు పక్కనబెట్టామని బీసీసీఐ ముందుగా తెలిపింది. కాగా రోహిత్ గాయం గురించి తనకు తెలియదన్న కోచ్ రవిశాస్త్రి.. ఈ వ్యవహారంతో తనకు సంబంధం లేదని చెప్పే ప్రయత్నం చేశాడు. హిట్‌మ్యాన్‌కు 2-3 వారాల విశ్రాంతి అవసరమని బీసీసీఐ ప్రకటించింది. రోహిత్ ఫిట్‌గా లేడని గంగూలీ చెప్పిన కొద్ది గంటల్లోనే హిట్ మ్యాన్ ఐపీఎల్ మ్యాచ్‌లో బరిలోకి దిగి అందర్నీ ఆశ్చర్యపరిచాడు.

రోహిత్ గాయం కారణంగా మూడు ఐపీఎల్ మ్యాచ్‌లకు దూరం కాగా.. అతడి స్థానంలో పోలార్డ్ కెప్టెన్‌గా వ్యవహరించాడు. సన్‌రైజర్స్‌తో మ్యాచ్ ముంబైకి నామమాత్రమే. దీంతో ఈ మ్యాచ్‌కు సైతం రోహిత్ దూరంగా ఉంటాడని భావించారంతా. కానీ రోహిత్ అనూహ్యంగా బరిలో దిగి అందర్నీ ఆశ్చర్యపరిచాడు. తక్కువ స్కోరుకే ఔటైనప్పటికీ.. ఫీల్డింగ్ సమయంలోనూ ఎక్కడా ఇబ్బంది పడలేదు. దీంతో రోహిత్ ఫిట్‌నెస్ అంశం మరోసారి తెర మీదకు వచ్చింది.

‘‘రోహిత్ గురించి గతంలో ఏం బయటకు వచ్చిందో తెలియదు. అవన్నీ పక్కనబెడితే.. రోహిత్ ఫిట్‌గా ఉన్నాడనేది భారత క్రికెట్‌కు గొప్ప వార్త’’ అని సునీల్ గావస్కర్ తెలిపాడు.

‘‘రోహిత్ తిరిగి ఆడే విషయంలో తొందరపడితే.. మరోసారి గాయం బారిన పడతాడని అందరూ ఆందోళన చెందడం సరైందే. కానీ అతడు ఆత్మవిశ్వాసంతో కనిపించాడు. 30 యార్డ్ సర్కిల్ దగ్గర, బౌండరీ లైన్ దగ్గర ఫీల్డింగ్ చేశాడు’’ అని గావస్కర్ గుర్తు చేశాడు.

‘‘నెట్స్‌లో ఎంత ఫిట్‌గా కనిపించినా ఒత్తిడి ఉండదు కానీ మ్యాచ్‌లో ఒత్తిడికి లోనవుతాం. మ్యాచ్ ఆడితేనే ఎంత ఫిట్‌గా ఉన్నామని తెలుస్తుంది. కెప్టెన్, వైస్ కెప్టెన్ అనేది సమస్య కాబోదు. ఆటగాడు అందుబాటులో ఉండటమే కీలకం’’ అని గావస్కర్ తెలిపాడు.