డివిలియర్స్ ఫిట్.. చెన్నైతో మ్యాచ్‌కు రెడీ

రాయల్ ఛాలెంజర్స్ బెంగళూరు హిట్టర్ ఏబీ డివిలియర్స్ ఫిటెనెస్ సాధించినట్లు కనిపిస్తోంది. జ్వరం కారణంగా గత రెండు మ్యాచ్‌లకి దూరమైన డివిలియర్స్.. శనివారం చెన్నై సూపర్ కింగ్స్‌తో జరగనున్న మ్యాచ్‌లో బరిలోకి దిగనున్నట్లు వెల్లడించాడు. టోర్నీలో ఇప్పటి వరకు 8 మ్యాచ్‌లాడిన బెంగళూరు జట్టు.. ఐదింట్లో ఓడి.. మూడు మ్యాచ్‌ల్లో విజయాన్ని అందుకుంది. దీంతో.. ప్రస్తుతం 6 పాయింట్లతో పట్టికలో ఐదో స్థానంలో కొనసాగుతోంది.

‘గత నాలుగు రోజులు తీవ్రమైన జ్వరం నన్ను బాధించింది. గతంలో నేనుప్పుడూ ఇంతలా అనారోగ్యం బారిన పడలేదు. ప్రస్తుతం ఆరోగ్యం కొంత మెరుగైంది. శనివారం చెన్నై సూపర్ కింగ్స్‌తో జరగనున్న మ్యాచ్‌కి అందుబాటులో ఉంటాను. టోర్నీలో బెంగళూరు జట్టు ఇంకా స్థాయికి తగిన ప్రదర్శన చేయలేదు. గత రెండు మ్యాచ్‌ల్లో నేను ఆడలేకపోయినా.. అతికష్టంగా టీవీలో వాటిని వీక్షించాను. సొంతగడ్డపై జరిగిన ఆ మ్యాచ్‌ల్ని నేను మిస్ అవడం చాలా నిరాశ కలిగించింది’ అని డివిలియర్స్ వెల్లడించాడు.