ఐపీఎల్ 2020లో చెన్నై బోణి అదిరింది.. ముంబయికి పంచ్

ఐపీఎల్ 2020 సీజన్ ఆరంభ మ్యాచ్‌లోనే డిఫెండింగ్ ఛాంపియన్‌ ముంబయి ఇండియన్స్‌కి ధోనీ కెప్టెన్సీ‌లోని చెన్నై సూపర్ కింగ్స్ ఊహించని పంచ్ ఇచ్చింది. అబుదాబి వేదికగా శనివారం రాత్రి జరిగిన తొలి మ్యాచ్‌లో 5 వికెట్ల తేడాతో ముంబయిని ఓడించిన చెన్నై.. టోర్నీలో ఘనమైన బోణినీ అందుకుంది. ఆఖరి ఓవర్ వరకూ ఉత్కంఠగా సాగిన ఈ మ్యాచ్‌లో టాస్ ఓడి తొలుత బ్యాటింగ్ చేసిన ముంబయి టీమ్ 9 వికెట్ల నష్టానికి 162 పరుగులు చేయగా.. ఛేదనలో అంబటి రాయుడు (71: 48 బంతుల్లో 6x4, 3x6), డుప్లెసిస్ (58 నాటౌట్: 44 బంతుల్లో 6x4) దూకుడుగా ఆడటంతో చెన్నై టీమ్ 19.2 ఓవర్లలోనే 166/5తో విజయాన్ని అందుకుంది. ఇక టోర్నీలో రెండో మ్యాచ్‌ కింగ్స్ ఎలెవన్ పంజాబ్, డిల్లీ క్యాపిటల్స్ మధ్య దుబాయ్ వేదికగా ఆదివారం రాత్రి 7.30కి జరగనుంది.


ముంబయి జట్టులో రోహిత్ శర్మ (12), హార్దిక్ పాండ్య (14), కీరన్ పొలార్డ్ (18) నిరాశపరచగా.. డికాక్ (33: 20 బంతుల్లో 5x4), సౌరభ్ తివారి (42: 31 బంతుల్లో 3x4, 1x6) ఫర్వాలేదనిపించారు. కానీ.. ఈ ఇద్దరూ కీలక సమయంలో ఔటవగా.. ముంబయి లోయర్ ఆర్డర్ పూర్తిగా తేలిపోయింది. దాంతో.. వరుస వికెట్లు పడగొట్టిన చెన్నై బౌలర్లు.. ముంబయి టీమ్‌ని తక్కువ స్కోరుకే పరిమితం చేయగలిగారు.


అనంతరం లక్ష్యఛేదనలో చెన్నై ఓపెనర్లు మురళీ విజయ్ (1), షేన్ వాట్సన్ (4) తేలిపోయినా.. నాలుగో స్థానంలో వచ్చిన అంబటి రాయుడు బాధ్యతాయుత ఇన్నింగ్స్‌తో ఆకట్టుకున్నాడు. డుప్లెసిస్‌తో కలిసి మూడో వికెట్‌కి 115 పరుగుల భాగస్వామ్యం నెలకొల్పిన అంబటి రాయుడు.. జట్టు స్కోరు 121 వద్ద ఔటవగా.. ఆ తర్వాత వచ్చిన రవీంద్ర జడేజా (10), శామ్ కరన్ (18: 6 బంతుల్లో 1x4, 2x6) క్రీజులో ఉన్నంతసేపు హిట్టింగ్‌తో అదరగొట్టేశారు. దాంతో.. 19వ ఓవర్‌లోనే చెన్నై చేతిలోకి మ్యాచ్ వచ్చేయగా.. ఆఖరి ఓవర్‌లో వరుసగా రెండు బౌండరీలతో గెలుపు లాంఛనాన్ని డుప్లెసిస్ పూర్తి చేశాడు.