IPL Playoffs: చెన్నై ఇప్పటికీ ప్లేఆఫ్స్‌కు చేరొచ్చు.. నమ్మశక్యంగా లేకున్నా నిజమే!

ముంబై ఇండియన్స్ చేతిలో పది వికెట్ల తేడాతో చిత్తుగా ఓడిన చెన్నై సూపర్ కింగ్స్ ప్లేఆఫ్స్ చేరే అవకాశాలు దాదాపుగా మూసుకుపోయినట్లే. 11 మ్యాచ్‌ల్లో మూడు విజయాలు మాత్రమే సాధించిన ధోనీ సేన పాయింట్ల పట్టికలో చివరి స్థానంలో నిలిచింది. ముంబై పేసర్లు విజృంభించడంతో 20 ఓవర్లలో 119 పరుగులకే చెన్నై పరిమితమైంది. స్వల్ప లక్ష్యాన్ని ముంబై ఇండియన్స్ 12.2 ఓవర్లలో చేధించి ఘన విజయాన్ని అందుకుంది. ఈ విజయంతో ముంబై పాయింట్ల పట్టికలో తిరిగి అగ్రస్థానానికి చేరుకోగా.. చెన్నై అట్టడుగున నిలిచింది.

ఈ సీజన్లో మూడు విజయాలు మాత్రమే సాధించినప్పటికీ.. ఇప్పటికీ ప్లేఆఫ్స్ చేరే అవకాశం చెన్నైకి ఉంది. తదుపరి మూడు మ్యాచ్‌ల్లో భారీ విజయాలు సాధిస్తే.. ధోనీ సేన నెట్ రన్ రేట్ తేడాతో టాప్-4లో నిలుస్తుంది. ఒక్క మ్యాచ్‌లో ఓడినా లేదంటే కొద్ది తేడాతో గెలిచినా.. ఈ సీజన్లో చెన్నై కథ ముగుస్తుంది.

చెన్నై టాప్-4లో నిలవాలంటే.. ఆ జట్టు బాగా ఆడటమే కాదు.. కోల్‌కతా నైట్ రైడర్స్ ప్రదర్శన కూడా కీలకం కానుంది. కోల్‌కతా ఆడబోయే తర్వాతి నాలుగు మ్యాచ్‌ల్లో ఒక దాంట్లోనే గెలవాల్సి ఉంటుంది. ఇప్పటికీ పది పాయింట్లను ఖాతాలో వేసుకున్న నైట్ రైడర్స్.. మరో రెండు మ్యాచ్‌లు గెలిస్తే.. చెన్నై‌కు నిరాశ తప్పదు.

కింగ్స్ ఎలెవన్ పంజాబ్, రాజస్థాన్ రాయల్స్, సన్‌రైజర్స్ హైదరాబాద్ జట్ల ప్రదర్శన కూడా చెన్నై సూపర్ కింగ్స్ అవకాశాలను ప్రభావితం చేస్తుంది. ఈ మూడు జట్లలో ఏ జట్టయినా రెండు కంటే ఎక్కువ విజయాలు సాధిస్తే... ప్లేఆఫ్స్ రేసు నుంచి చెన్నై వైదొలుగుతుంది. ఇదంతా జరుగుతుందని చెప్పలేం. కానీ చెన్నై ఫ్యాన్స్ మాత్రం జరగాలని ఆశిస్తున్నారు.