T20ల్లో 1000 సిక్సులు.. క్రిస్ గేల్ అరుదైన రికార్డ్.. రెండోస్థానంలో ఎవరంటే?

టీ20 క్రికెట్ చరిత్రలో వెయ్యి సిక్సులు బాదిన తొలి బ్యాట్స్‌మెన్‌గా క్రిస్ గేల్ రికార్డ్ క్రియేట్ చేశాడు. రాజస్థాన్ రాయల్స్‌తో జరిగిన మ్యాచ్‌లో 99 రన్స్ చేసిన ఈ పంజాబ్ ఆటగాడు.. టీ20 ఫార్మాట్లో వెయ్యి సిక్సులు కొట్టిన తొలి హిట్టర్‌గా నిలిచాడు. పొట్టి ఫార్మాట్లో అత్యధిక పరుగులు చేసిన ఆటగాడిగా నిలిచిన ఈ కరేబియన్ ఆటగాడు.. సిక్సర్ల ద్వారానే 6000కుపైగా పరుగులు పూర్తి చేసుకున్నాడు.

కార్తీక్ త్యాగి వేసిన ఇన్నింగ్స్‌ 19.5వ ఓవర్లో సిక్స్ కొట్టిన గేల్.. టీ20ల్లో వెయ్యి సిక్సులు పూర్తి చేసుకున్నాడు. మ్యాచ్ అనంతరం గేల్ మాట్లాడుతూ.. 41 వయసులోనూ సిక్సులు కొట్టగలగడం పట్ల ఆనందం వ్యక్తం చేశాడు. టీ20ల్లో వెయ్యి సిక్సులు బాదినట్లు మ్యాచ్ సమయంలో తనకు తెలియదని గేల్ చెప్పాడు. గత కొన్నేళ్లుగా పడుతున్న కష్టం, అంకితభావం కారణంగానే తాను ఈ ఫీట్ సాధించగలిగానని గేల్ తెలిపాడు. 99 రన్స్ వద్ద ఔటవడం దురదృష్టకరమన్నాడు.

టీ20ల్లో అత్యధిక సిక్సులు కొట్టిన ఆటగాడు గేల్ (1001) కాగా.. రెండో స్థానంలో కరేబియన్ హిట్టర్, ముంబై ఇండియన్ బ్యాట్స్‌మెన్ కీరన్ పోలార్డ్ (690) ఉన్నాడు. మెక్‌కల్లమ్ (485), వాట్సన్ (467), రస్సెల్ (447), డివిలియర్స్ (417) తర్వాతి స్థానాల్లో ఉన్నారు. ఆరోన్ ఫింగ్ (384), రోహిత్ శర్మ (376) తర్వాతి స్థానాల్లో ఉన్నారు.

అబుదాబీ వేదికగా జరిగిన ఈ మ్యాచ్‌లో ముందు బ్యాటింగ్ చేసిన పంజాబ్ 20 ఓవర్లలో 4 వికెట్ల నష్టానికి 185 రన్స్ చేయగా.. రాజస్థాన్ రాయల్స్ 17.3 ఓవర్లలోనే లక్ష్యాన్ని చేధించింది. ఆల్‌రౌండర్ ప్రదర్శనతో ఆకట్టుకున్న బెన్ స్టోక్స్‌కు మ్యాన్ ఆఫ్ ది మ్యాచ్ దక్కింది.