KXIP vs DC: శిఖర్ ధావన్ 106 నాటౌట్.. పంజాబ్ టార్గెట్ 165

ఐపీఎల్ 2020 సీజన్‌లో ఢిల్లీ క్యాపిటల్స్ ఓపెనర్ శిఖర్ ధావన్ బ్యాక్ టు బ్యాక్ సెంచరీలతో చెలరేగాడు. కింగ్స్ ఎలెవన్ పంజాబ్‌తో దుబాయ్ వేదికగా మంగళవారం రాత్రి జరుగుతున్న మ్యాచ్‌లో శిఖర్ ధావన్ (106 నాటౌట్: 61 బంతుల్లో 12x4, 3x6) అజేయ శతకం బాదడంతో టాస్ గెలిచి మొదట బ్యాటింగ్ చేసిన ఢిల్లీ టీమ్ 5 వికెట్ల నష్టానికి 164 పరుగులు చేసింది. పంజాబ్ బౌలర్లలో మహ్మద్ షమీ రెండు, మాక్స్‌వెల్, జేమ్స్ నీషమ్, మురగన్ అశ్విన్ తలో వికెట్ పడగొట్టారు. షార్జా వేదికగా గత శనివారం చెన్నై సూపర్ కింగ్స్‌తో జరిగిన మ్యాచ్‌లో అజేయ శతకంతో ఢిల్లీని గెలిపించిన ధావన్.. తాజాగా బ్యాక్ టు బ్యాక్ శతకాన్ని నమోదుచేశాడు. 13 ఏళ్ల ఐపీఎల్ చరిత్రలో ఇలా ఓ బ్యాట్స్‌మెన్‌ వరుస మ్యాచ్‌ల్లో సెంచరీ బాదడం ఇదే తొలిసారి.


మ్యాచ్‌లో టాస్ గెలిచిన ఢిల్లీ క్యాపిటల్స్ కెప్టెన్ శ్రేయాస్ అయ్యర్ బ్యాటింగ్ ఎంచుకున్నాడు. దాంతో.. పృథ్వీ షా (7: 11 బంతుల్లో 1x4)తో కలిసి ఇన్నింగ్స్ ప్రారంభించిన శిఖర్ ధావన్.. మరోసారి బాధ్యతాయుత ఇన్నింగ్స్‌తో ఆకట్టుకున్నాడు. పృథ్వీ షా ఇన్నింగ్స్ నాలుగో ఓవర్‌లోనే ఔటైపోగా.. అనంతరం వచ్చిన శ్రేయాస్ అయ్యర్ (14: 12 బంతుల్లో 1x6), రిషబ్ పంత్ (14: 20 బంతుల్లో 1x4), స్టాయినిస్ (9: 10 బంతుల్లో) కూడా నిరాశపరిచారు. అయినప్పటికీ.. ఒక ఎండ్‌లో నిలకడగా ఆడిన శిఖర్ ధావన్.. ఐపీఎల్‌ కెరీర్‌లో రెండో శతకాన్ని పూర్తి చేసుకున్నాడు. ఒకవేళ ధావన్‌తో పాటు టాప్ ఆర్డర్‌లో ఎవరైనా దూకుడుగా ఆడింటే..? ఢిల్లీ మరింత మెరుగైన స్కోరు సాధించి ఉండేది. ఆఖర్లో సిమ్రాన్ హిట్‌మెయర్ (10 నాటౌట్: 6 బంతుల్లో 1x6) ఒక సిక్స్‌తోనే సరిపెట్టాడు.