KKR చేతిలో ఓడాక వార్నర్ భావోద్వేగం.. ‘కోపం పట్టలేక అలా చేద్దామనుకున్నా’

కోల్‌కతా నైట్ రైడర్స్‌తో జరిగిన మ్యాచ్‌లో ఆఖరి వరకూ అద్భుతంగా ఆడిన డేవిడ్ వార్నర్.. చివరి బంతికి రెండు పరుగులు తీయలేకపోవడంతో.. మ్యాచ్ టై కాగా.. సూపర్ ఓవర్లో సన్‌రైజర్స్ ఓడిన సంగతి తెలిసిందే. బంతిని గాల్లోకి లేపకుండా ఆఖరి ఓవర్లో ఫోర్లు బాది జాగ్రత్తగా ఆడిన వార్నర్.. ఒత్తిడిలో చివరి బంతికి రెండు పరుగులు తీయలేకపోవడం అందర్నీ ఆశ్చర్యపరిచింది.

గెలుపు ఖాయం అనుకున్న మ్యాచ్‌లో సన్‌రైజర్స్ ఓటమిని కెప్టెన్ డేవిడ్ వార్నర్ జీర్ణించుకోలేకపోతున్నాడు. ఓటమికి ఎవర్నీ నిందించలేక.. కోపాన్ని అణచుకోలేక.. తన నాలుకను తానే కొరికేసుకోవాలని అనిపించిందని వార్నర్ వాపోయాడు. చివరి ఓవర్లలో పరుగులు ఎక్కువగా ఇచ్చామన్న వార్నర్.. గత మూడు మ్యాచ్‌ల్లో విజయానికి చేరువగా వచ్చినప్పటికీ.. గెలవలేకపోయామన్నాడు.

టాస్ గెలిచాక ఫీల్డింగ్ చేయాలన్న తన నిర్ణయానికే ఇప్పటికీ కట్టుబడి ఉంటానన్న సన్‌రైజర్స్ కెప్టెన్.. 165 పరుగుల లక్ష్యాన్ని చేధించడం పెద్ద కష్టం కాదని.. కానీ కీలక వికెట్లు కోల్పోవడం దెబ్బతీసిందన్నాడు.