ఐపీఎల్ 2020లో ఢిల్లీకి ఎదురుదెబ్బ.. గాయంతో ఓపెనర్ ఔట్..?

ఐపీఎల్ 2020 సీజన్‌లో వరుస విజయాలతో మంచి జోరుమీదున్న ఢిల్లీ క్యాపిటల్స్‌కి గట్టి ఎదురుదెబ్బ తగిలింది. కోల్‌కతా నైట్‌రైడర్స్‌తో షార్జా వేదికగా శనివారం రాత్రి మ్యాచ్ ఆడుతూ యువ ఓపెనర్ పృథ్వీ షా గాయపడ్డాడు. ఇన్నింగ్స్ 9వ ఓవర్ వేసిన రసెల్ బౌలింగ్‌లో పృథ్వీ షా బంతిని మిడాఫ్ దిశగా నెట్టి సింగిల్ కోసం పరుగెత్తగా.. అక్కడే ఫీల్డింగ్ చేస్తున్న పాట్ కమిన్స్ బంతిని నాన్‌స్ట్రైక్ ఎండ్‌ వైపు వికెట్లపైకి విసిరాడు. కానీ.. వికెట్లని తాకని బంతి వేగంగా వెళ్లి పృథ్వీ షా కాలి మడమకి తగిలింది.

మ్యాచ్‌లో అప్పటికే మంచి దూకుడు మీద కనిపించిన పృథ్వీ షా (66: 41 బంతుల్లో 4x4, 4x6).. నొప్పితో మైదానంలోనే కాసేపు పడుకుండిపోయాడు. వెంటనే వచ్చిన ఢిల్లీ టీమ్ ఫిజియో.. కాలి మడమకి ఫెయిన్ రిలీఫ్ స్ప్రే కొట్టిన తర్వాత మళ్లీ బ్యాటింగ్‌ కొనసాగించిన పృథ్వీ షా 13వ ఓవర్‌లో నాగర్‌కోటి బౌలింగ్‌లో ఔటయ్యాడు. అయితే.. ఆ తర్వాత కోల్‌కతా ఛేదన సమయంలో పృథ్వీ షా ఫీల్డింగ్‌కి రాలేదు. డ్రెస్సింగ్ రూములో పాదానికి ఐస్‌ ప్యాక్ పెడుతూ కనిపించాడు.


2018లో ఆస్ట్రేలియా పర్యటనకి ఎంపికైన పృథ్వీ షా.. ప్రాక్టీస్ మ్యాచ్‌లో బౌండరీ లైన్ వద్ద క్యాచ్ పడుతూ శరీరంపై నియంత్రణ కోల్పోయాడు. దాంతో.. అతని ఎడమ కాలి మడమకి తీవ్ర గాయమవగా.. చాలా రోజుల పాటు అతను ఆటకి దూరంగా ఉండాల్సి వచ్చింది. తాజాగా మళ్లీ అదే కాలి మడమకి గాయమవడంతో.. ఐపీఎల్ 2020లో ఢిల్లీ క్యాపిటల్స్ తర్వాత మ్యాచ్‌కి అతను అందుబాటులో ఉండటం అనుమానమేనని వార్తలు వస్తున్నాయి. రాయల్ ఛాలెంజర్స్ బెంగళూరుతో దుబాయ్ వేదికగా సోమవారం రాత్రి 7.30 గంటలకి ఢిల్లీ క్యాపిటల్స్ మ్యాచ్ ఆడనుంది.