Jasprit Bumrah తెలివి.. రసెల్‌ని రెచ్చగొట్టి మరీ బుట్టలో..!

కోల్‌కతా నైట్‌రైడర్స్‌తో అబుదాబి వేదికగా బుధవారం రాత్రి జరిగిన మ్యాచ్‌లో ముంబయి ఇండియన్స్ ఫాస్ట్ బౌలర్ జస్‌ప్రీత్ బుమ్రా పక్కా వ్యూహంతో ఆండ్రీ రసెల్‌ని బోల్తా కొట్టించేశాడు. 196 పరుగుల లక్ష్యఛేదనలో ఆండ్రీ రసెల్ లాంటి పవర్ హిట్టర్ ఎక్కువ సేపు క్రీజులో ఉంటే ప్రమాదమని ముందే గ్రహించిన జస్‌ప్రీత్ బుమ్రా, ముంబయి కెప్టెన్ రోహిత్ శర్మ.. తెలివిగా ఓ ప్లాన్ వేశారు. ఈ క్రమంలో ఇన్నింగ్స్ 13వ ఓవర్ వరకూ బుమ్రాతో కేవలం ఒకే ఒక ఓవర్‌ని బౌలింగ్ చేయించిన రోహిత్ శర్మ.. అతడ్ని రసెల్ కోసమే అలానే పక్కన పెట్టాడు. 12వ ఓవర్‌ మధ్యలో నితీశ్ రాణా ఔటవడంతో ఆరో స్థానంలో ఆండ్రీ రసెల్ బ్యాటింగ్‌కి వచ్చాడు. ఇక అక్కడి నుంచి ప్లాన్ తెరపైకి వచ్చింది.


రసెల్‌ బ్యాటింగ్‌కి రాగానే జస్‌ప్రీత్ బుమ్రాని రోహిత్ శర్మ రంగంలోకి దింపగా.. ఆ ఓవర్‌లో రసెల్‌ తాను ఎదుర్కొన్నతొలి బంతిని నేరుగా బుమ్రా పక్క నుంచి బౌండరీకి తరలించేందుకు ప్రయత్నించాడు. అయితే.. సాహసోపేతంగా ఆ బంతిని అడ్డుకున్న బుమ్రా.. సింగిల్ కోసం కాస్త క్రీజు వెలుపలికి వచ్చిన రసెల్ ‌పైకి వేగంగా విసిరేలా కనిపించాడు. ఆ టైమ్‌లో బుమ్రా చాలా కోపంలో కనిపించగా.. రసెల్ కూడా తన ఇగో హర్ట్ అయినట్లు ఎక్స్‌ప్రెషన్స్ ఇచ్చాడు. ఇక్కడే బుమ్రా అతని ఏకాగ్రతని చెదరగొట్టడంలో సక్సెస్ అయ్యాడు.


రసెల్‌కి ఆ ఓవర్‌లో పదే పదే యార్కర్లని సంధించిన బుమ్రా.. అతను స్వేచ్ఛగా ఆడే అవకాశం ఇవ్వలేదు. దాంతో.. బుమ్రా తర్వాత ఓవర్‌ కోసం ప్రతీకారంతో ఎదురుచూసిన రసెల్ (11: 11 బంతుల్లో 2x4).. ఇన్నింగ్స్ 16వ ఓవర్‌లో అతను బౌలింగ్‌కిరాగానే తొలి బంతికి భారీ షాట్ ఆడే ప్రయత్నం చేశాడు. కానీ.. ఫుల్ లెంగ్త్‌లో బంతిని బుమ్రా విసరగా.. అది బ్యాట్‌కి అందకుండా నేరుగా వెళ్లి ఆఫ్ స్టంప్‌ని గీరాటేసింది. దాంతో.. బుమ్రా ‘అయిపోయ్’ అనే తరహాలో ఎక్స్‌ప్రెషన్స్‌ ఇస్తూ సంబరాలు చేసుకున్నాడు. వాస్తవానికి జస్‌ప్రీత్ బుమ్రా అలా వేగంగా బ్యాట్స్‌మెన్‌వైపు బంతిని విసరడానికి ప్రయత్నించడం చాలా అరుదు. అది కూడా బ్యాట్స్‌మెన్‌ క్రీజులో ఉన్నప్పుడు అలా విసరడు. దాంతో.. రసెల్‌ని ఫస్ట్‌లోనే రెచ్చగొట్టి బుట్టలో వేసినట్లు తెలుస్తోంది.