ఐపీఎల్‌ 2020లో రాజస్థాన్ జోరుకి బ్రేక్‌లేసిన కోల్‌కతా

ఐపీఎల్ 2020 సీజన్‌లో వరుసగా రెండు మ్యాచ్‌ల్లో 200పైచిలుకు స్కోరు చేసిన రాజస్థాన్ రాయల్స్ జోరుకి బుధవారం రాత్రి బ్రేక్‌పడింది. దుబాయ్ వేదికగా కోల్‌కతా నైట్‌రైడర్స్‌తో జరిగిన మ్యాచ్‌లో 175 పరుగుల లక్ష్య ఛేదనకు దిగిన రాజస్థాన్ రాయల్స్ వరుసగా వికెట్లు చేజార్చుకుని 137/9కే పరిమితమైంది.. అంతకముందు ఓపెనర్ శుభమన్ గిల్ (47: 34 బంతుల్లో 5x4, 1x6), హిట్టర్లు ఇయాన్ మోర్గాన్ (34 నాటౌట్: 23 బంతుల్లో 1x4, 2x6), ఆండ్రీ రసెల్ (24: 14 బంతుల్లో 3x6) దూకుడుగా ఆడటంతో తొలుత బ్యాటింగ్ చేసిన కోల్‌కతా 6 వికెట్ల నష్టానికి 174 పరుగులు చేసింది.

కింగ్స్ ఎలెవన్ పంజాబ్‌తో గత ఆదివారం జరిగిన మ్యాచ్‌లో 224 పరుగుల లక్ష్యాన్ని ఛేదించిన రాజస్థాన్ రాయల్స్.. 175 పరుగుల లక్ష్యాన్ని అలవోకగా ఛేదిస్తుందని అంతా ఊహించారు. కానీ.. ఆరంభం నుంచే వరుసగా వికెట్లు చేజార్చుకున్న ఆ జట్టు ఏ దశలోనూ గెలిచేలా కనిపించలేదు. ఓపెనర్ స్టీవ్‌స్మిత్ (3) రెండో ఓవర్‌లోనే ఔటవగా.. అనంతరం వచ్చిన సంజు శాంసన్ (8), రాబిన్ ఉతప్ప (2), రియాన్ పరాగ్ (1) వరుసగా పెవిలియన్‌కి క్యూ కట్టారు.


ఒక ఎండ్‌లో వికెట్లు పడినా ఓపెనర్ జోస్ బట్లర్ (21: 16 బంతుల్లో 1x4, 2x6) మాత్రం కాసేపు దూకుడుగా ఆడాడు. ఇక గత మ్యాచ్‌లో ఒకే ఓవర్‌లో ఐదు సిక్సర్లు బాదిన రాహుల్ తెవాటియా (14: 10 బంతుల్లో 1x6) ఈ మ్యాచ్‌లో తక్కువ స్కోరుకే ఔటవడంతో మ్యాచ్‌పై రాజస్థాన్ ఆశలు వదులుకుంది. ఆఖర్లో టామ్ కరన్ (54 నాటౌట్: 36 బంతుల్లో 2x4, 3x6) కాసేపు బ్యాట్ ఝళిపించాడు. కానీ.. అతని హిట్టింగ్ రాజస్థాన్ ఓటమి అంతరాన్ని మాత్రమే తగ్గించగలిగింది. కోల్‌కతా బౌలర్లలో శివమ్ మావి, నాగర్‌కోటి, వరుణ్ చక్రవర్తి తలో రెండు వికెట్లు పడగొట్టగా.. సునీల్ నరైన్, పాట్ కమిన్స్, కుల్దీప్‌కి ఒక్కో వికెట్ దక్కింది.