దినేశ్ కార్తీక్ మెరుపు అర్ధ శతకం.. పంజాబ్ టార్గెట్ 165

ఐపీఎల్ 2020 సీజన్‌లో కోల్‌కతా నైట్‌రైడర్స్ కెప్టెన్ దినేశ్ కార్తీక్ ఎట్టకేలకి ఫామ్ అందుకున్నాడు. కింగ్స్ ఎలెవన్ పంజాబ్‌తో అబుదాబి వేదికగా శనివారం జరుగుతున్న మ్యాచ్‌లో కెప్టెన్ దినేశ్ కార్తీక్ (58: 29 బంతుల్లో 8x4, 2x6), ఓపెనర్ శుభమన్ గిల్ (57: 47 బంతుల్లో 5x4) హాఫ్ సెంచరీలు బాదడంతో టాస్ గెలిచి తొలుత బ్యాటింగ్ చేసిన కోల్‌కతా 6 వికెట్ల నష్టానికి 164 పరుగులు చేసింది. తాజా సీజన్‌లో కార్తీక్‌కి ఇది తొలి అర్ధశతకంకాగా.. శుభమన్‌ గిల్‌కి ఇది రెండోది. పంజాబ్ బౌలర్లలో మహ్మద్ షమీ, అర్షదీప్ సింగ్, రవి బిష్ణోయ్ తలో వికెట్ తీయగా.. మ్యాచ్ ఆరంభంలో నితీశ్ రాణా (2), ఆఖర్లో దినేశ్ కార్తీక్ రనౌటయ్యారు.

మ్యాచ్‌లో టాస్ గెలిచిన దినేశ్ కార్తీక్ బ్యాటింగ్ ఎంచుకోగా.. మంచి ఫామ్‌లో ఉన్న ఓపెనర్ రాహుల్ త్రిపాఠి (4: 10 బంతుల్లో) ఆరంభంలోనే మహ్మద్ షమీ బౌలింగ్‌లో క్లీన్ బౌల్డయ్యాడు. అనంతరం వచ్చిన నితీశ్ రాణా (2) లేని పరుగు కోసం ప్రయత్నిస్తూ శుభమన్ గిల్‌తో సమన్వయ లోపం కారణంగా రనౌటవడంతో.. కోల్‌కతా ఆరంభంలోనే ఒత్తిడిలో పడింది. అనూహ్యంగా బ్యాటింగ్ ఆర్డర్‌లో ముందుకు వచ్చిన ఇయాన్ మోర్గాన్ (24: 23 బంతుల్లో 2x4, 1x6).. శుభమన్ గిల్‌తో కలిసి మరీ నెమ్మదిగా ఆడటంతో.. కోల్‌కతా 10 ఓవర్లు ముగిసే సమయానికి 60/2తో తక్కువ స్కోరుకే పరిమితమయ్యేలా కనిపించింది.

ఇన్నింగ్స్ 11వ ఓవర్‌లో మోర్గాన్ ఔటవడంతో క్రీజులోకి వచ్చిన దినేశ్ కార్తీక్.. ఇన్నింగ్స్ 16వ ఓవర్‌ నుంచి వరుస బౌండరీలతో చెలరేగిపోయాడు. అర్షదీప్ వేసిన ఆ ఓవర్‌లో మూడు ఫోర్లు బాదిన కార్తీర్.. 17వ ఓవర్ వేసిన జోర్దాన్ బౌలింగ్‌లోనూ రెండు ఫోర్లు, ఒక సిక్స్ బాదేశాడు. దాంతో.. కోల్‌కతా ఇన్నింగ్స్‌లో ఒక్కసారిగా ఊపు వచ్చింది. 18వ ఓవర్‌ వేసిన షమీకి కూడా రెండు ఫోర్లు బాదిన కార్తీక్ 22 బంతుల్లోనే హాఫ్ సెంచరీ మార్క్‌ని అందుకున్నాడు. కానీ.. ఆఖర్లో పుంజుకున్న పంజాబ్ బౌలర్లు శుభమన్ గిల్‌తో పాటు ఆండ్రీ రసెల్ (5)ని కూడా ఔట్ చేసేశారు. అయినప్పటికీ.. కోల్‌కతా చివరి 10 ఓవర్లలో 104 పరుగులు రాబట్టింది.