CSK vs KKR: నితీశ్ రాణా హాఫ్ సెంచరీ.. చెన్నై టార్గెట్ 173

ఐపీఎల్ 2020 సీజన్‌లో నితీశ్ రాణా మరోసారి బాధ్యతాయుత ఇన్నింగ్స్‌‌తో ఆకట్టుకున్నాడు. చెన్నై సూపర్ కింగ్స్‌తో దుబాయ్ వేదికగా గురువారం రాత్రి జరుగుతున్న మ్యాచ్‌లో ఓపెనర్ నితీశ్ రాణా (87: 61 బంతుల్లో 10x4, 4x6) హాఫ్ సెంచరీ బాదడంతో టాస్ ఓడి మొదట బ్యాటింగ్ చేసిన కోల్‌కతా నైట్‌రైడర్స్ 5 వికెట్ల నష్టానికి 172 పరుగులు చేసింది. మ్యాచ్ హాఫ్ సెంచరీ తర్వాత స్పిన్నర్ కర్ణ్ శర్మ బౌలింగ్‌లో హ్యాట్రిక్ సిక్సర్లు బాదిన నితీశ్ రాణా.. అదే ఊపులో లుంగి ఎంగిడి బౌలింగ్‌లోనూ భారీ షాట్ ఆడే ప్రయత్నంలో వికెట్ చేజార్చుకున్నాడు. ఆఖర్లో దినేశ్ కార్తీక్ (21 నాటౌట్: 10 బంతుల్లో 3x4) చాకచక్యంగా పరుగులు రాబట్టగా.. చెన్నై బౌలర్లలో లుంగి ఎంగిడి రెండు, శాంట్నర్, జడేజా, కర్ణ్ శర్మ తలో వికెట్ పడగొట్టారు.

మ్యాచ్‌లో టాస్ గెలిచిన చెన్నై కెప్టెన్ ధోనీ ఫీల్డింగ్ ఎంచుకున్నాడు. దాంతో.. కోల్‌కతా ఇన్నింగ్స్‌ని ప్రారంభించిన శుభమన్ గిల్ (26: 17 బంతుల్లో 4x4), నితీశ్ రాణా జోడీ తొలి వికెట్‌కి 7.2 ఓవర్లలో 53 పరుగుల భాగస్వామ్యం నెలకొల్పింది. ప్రమాదకరంగా మారిన ఈ జంటని కర్ణ్ శర్మ విడదీశాడు. ఆ తర్వాత వచ్చిన సునీల్ నరైన్ (7: 7 బంతుల్లో 1x6), రింకు సింగ్ (11: 11 బంతుల్లో 1x4) దూకుడుగా ఆడే ప్రయత్నంలో వికెట్లు చేజార్చుకున్నారు. అయితే.. ఒక ఎండ్‌లో నిలకడగా ఆడిన నితీశ్ రాణా హాఫ్ సెంచరీ తర్వాత బ్యాట్ ఝళిపించేశాడు. కానీ.. టీమ్ స్కోరు 137 వద్ద అతను ఔటవగా.. ఆఖర్లో కెప్టెన్ ఇయాన్ మోర్గాన్ (15: 12 బంతుల్లో 2x4), దినేశ్ కార్తీక్ సిక్సర్లు కొట్టలేకపోయారు.