SRH చరిత్రలో తొలిసారి.. మనీష్ పాండే, విజయ్ శంకర్ అరుదైన రికార్డ్

రాజస్థాన్ రాయల్స్‌తో జరిగిన మ్యాచ్‌లో 8 వికెట్ల తేడాతో విజయం సాధించిన సన్‌రైజర్స్ హైదరాబాద్ ప్లేఆఫ్స్ ఆశలను సజీవంగా ఉంచుకుంది. ఈ మ్యాచ్‌లో ముందుగా బ్యాటింగ్ చేసిన రాజస్థాన్ 6 వికెట్ల నష్టానికి 154 పరుగులే చేయగా.. సన్‌రైజర్స్ 8 వికెట్ల తేడాతో ఘన విజయం సాధించింది. ఓపెనర్లు డేవిడ్ వార్నర్, బెయిర్‌స్టో త్వరగానే పెవిలియన్ చేరినప్పటికీ.. మనీష్ పాండే (83 నాటౌట్), విజయ్ శంకర్ (52 నాటౌట్) మూడో వికెట్‌కు 140 పరుగులు జోడించి ఆరెంజ్ ఆర్మీని గెలిపించారు.

సన్‌రైజర్స్ తరఫున ఇది 24వ శతక భాగస్వామ్యం కాగా.. ఆరెంజ్ ఆర్మీలో ఇద్దరు భారత బ్యాట్స్‌మెన్ శతక భాగస్వామ్యం నెలకొల్పడం ఇదే తొలిసారి కావడం విశేషం. 2013లో కోల్‌కతాతో జరిగిన మ్యాచ్‌లో పార్థీవ్ పటేల్, శిఖర్ ధావన్ తొలి వికెట్‌కు 89 పరుగులు జోడించారు. రాజస్థాన్‌తో మ్యాచ్‌ ముందు వరకూ సన్‌రైజర్స్‌లో భారత బ్యాట్స్‌మెన్ నమోదు చేసిన అత్యధిక భాగస్వామ్యం ఇదే. రాజస్థాన్‌తో మ్యాచ్‌లో పాండే, విజయ్ శంకర్ జోడీ ఈ రికార్డును బ్రేక్ చేసింది.

సన్‌రైజర్స్ ఎక్కువగా టాప్ ఆర్డర్‌పై ఆధారపడుతోంది. గతంలో వార్నర్-ధావన్.. ఇప్పుడు వార్నర్-బెయిర్‌స్టో జట్టుకు శుభారంభాలు ఇస్తున్నారు. నాలుగో స్థానంలో కేన్ విలియమ్సన్ బ్యాటింగ్ చేస్తున్నాడు. దీంతో భారత క్రికెటర్లలో మూడో స్థానంలో ఆడే మనీష్ పాండేకు మాత్రమే ఎక్కువ ఓవర్లు బ్యాటింగ్ చేసే అవకాశం ఉంటోంది. గాయం కారణంగా విలియమ్సన్ రాజస్థాన్‌తో మ్యాచ్‌కు దూరం కాగా.. విజయ్ శంకర్‌ను నాలుగో స్థానానికి ప్రమోట్ చేశారు.

విలియమ్సన్ స్థానంలో ఈ మ్యాచ్‌లో ఆడిన జేసన్ హోల్డర్.. బౌలింగ్‌లో ఆకట్టుకునే ప్రదర్శన చేశాడు. 4 ఓవర్లలో 33 పరుగులిచ్చి 3 వికెట్లు తీశాడు. ఉతప్పను రనౌట్ చేశాడు. శాంసన్, స్టీవ్ స్మిత్, రియాన్ పరాగ్‌లను హోల్డర్ పెవిలియన్ చేర్చగా.. మధ్య ఓవర్లలో విజయ్ శంకర్, రషీద్ ఖాన్ పొదుపుగా బౌలింగ్ చేశారు.