MI vs SRH: పొలార్డ్ మెరుపులు.. హైదరాబాద్ ప్లేఆఫ్ టార్గెట్ 150

ఐపీఎల్ 2020 సీజన్ ప్లేఆఫ్‌కి అర్హత సాధించాలంటే తప్పక గెలవాల్సిన మ్యాచ్‌లో సన్‌రైజర్స్ హైదరాబాద్ బౌలర్లు సమష్టిగా రాణించారు. దాంతో షార్జా వేదికగా మంగళవారం రాత్రి జరుగుతున్న మ్యాచ్‌లో టాస్ ఓడి మొదట బ్యాటింగ్ చేసిన ముంబయి ఇండియన్స్ 8 వికెట్ల నష్టానికి 149 పరుగులే చేయగలిగింది. ఆ జట్టులో కీరన్ పొలార్డ్ (41: 25 బంతుల్లో 2x4, 4x6) టాప్ స్కోరర్‌గా నిలిచాడు. హైదరాబాద్ బౌలర్లలో సందీప్ శర్మ మూడు వికెట్లు పడగొట్టగా.. జేసన్ హోల్డర్, నదీమ్ రెండేసి వికెట్లు, రషీద్ ఖాన్‌కి ఒక వికెట్ దక్కింది. ఈ మ్యాచ్‌లో గెలిస్తే హైదరాబాద్‌ నేరుగా ప్లేఆఫ్‌కి చేరనుంది. ఓడితే.. కోల్‌కతా నైట్‌రైడర్స్ చివరి ప్లేఆఫ్ బెర్తుని సొంతం చేసుకోనుంది.


మ్యాచ్‌లో టాస్ గెలిచిన హైదరాబాద్ కెప్టెన్ డేవిడ్ వార్నర్ ఫీల్డింగ్ ఎంచుకున్నాడు. దాంతో.. ఓపెనర్ డికాక్ (25: 13 బంతుల్లో 2x4, 2x6)తో కలిసి ముంబయి ఇన్నింగ్స్‌ని ప్రారంభించిన రోహిత్ శర్మ (4: 7 బంతుల్లో) ఆరంభంలోనే ఔటైపోయాడు. అనంతరం కొద్దిసేపటికే వరుసగా సిక్స్, ఫోర్‌తో జోరు మీద కనిపించిన డికాక్ కూడా బౌల్డయ్యాడు. ఈ ఇద్దరినీ వరుస ఓవర్లలో సందీప్ శర్మ ఔట్ చేసేశాడు. అయితే.. మిడిల్ ఓవర్లలో సూర్యకుమార్ యాదవ్ (36: 29 బంతుల్లో 5x4),ఇషాన్ కిషన్ (33: 30 బంతుల్లో 1x4, 2x6) నిలకడగా ఆడగా.. ఈ ఇద్దరి ఔట్ తర్వాత మళ్లీ ముంబయిలో తడబాటు మొదలైంది. కృనాల్ పాండ్య (0), సౌరభ్ తివారి (1), కౌల్టర్ నైల్ (1) ఇలా వచ్చి అలా వెళ్లిపోయారు. అయితే.. స్లాగ్ ఓవర్లలో బ్యాట్ ఝళిపించిన కీరన్ పొలార్డ్ వరుస సిక్సర్లు బాదేశాడు. మ్యాచ్‌లో ఇషాన్ కిషన్ క్యాచ్‌ని రషీద్ ఖాన్ వదిలేయగా.. సూర్యకుమార్ యాదవ్ క్యాచ్‌ని నదీమ్, పొలార్డ్ క్యాచ్‌ని మనీశ్ పాండే జారవిడిచారు.