IPL 2020 పాయింట్ల పట్టికలో పంజాబ్ జోరు.. హైదరాబాద్ బేజారు

ఐపీఎల్ 2020 సీజన్ ప్లేఆఫ్ రేసులో నిలవాలంటే తప్పక గెలవాల్సిన మ్యాచ్‌లో కింగ్స్ ఎలెవన్ పంజాబ్ ఆఖరి వరకూ పోరాడి విజయం సాధించగా.. సులువుగా గెలవాల్సిన మ్యాచ్‌ని తత్తరపాటులో సన్‌రైజర్స్ హైదరాబాద్ చేజార్చుకుంది. దుబాయ్ వేదికగా శనివారం రాత్రి బౌలర్లు సత్తాచాటిన మ్యాచ్‌లో 12 పరుగుల తేడాతో హైదరాబాద్‌ని ఓడించిన పంజాబ్ టీమ్.. పాయింట్ల పట్టికలోనూ ఐదో విజయంతో 5వ స్థానానికి దూసుకెళ్లింది. మరోవైపు పంజాబ్ తరహాలోనే 11 మ్యాచ్‌లాడిన హైదరాబాద్ ఏడో ఓటమితో ఆరో స్థానానికి పరిమితమవగా.. మిగిలిన మూడు మ్యాచ్‌లు గెలిచినా ఆ జట్టు ప్లేఆఫ్‌కి చేరడం కష్టమే..!

పట్టికలో ముంబయి ఇండియన్స్, ఢిల్లీ క్యాపిటల్స్, రాయల్ ఛాలెంజర్స్ బెంగళూరు 14 పాయింట్లతో ఇప్పటికే టాప్-3లో ఉండగా.. కోల్‌కతా, పంజాబ్ జట్లు 16 పాయింట్లు, రాజస్థాన్ 14 పాయింట్లు సాధించే అవకాశం ఉంది. దాంతో.. మిగిలిన మూడు మ్యాచ్‌ల్లోనూ సన్‌రైజర్స్ విజయాల్ని అందుకున్నా ప్లేఆఫ్ రేసులో నిలుస్తుందనే గ్యారంటీ లేదు. చివరిగా ఆడిన ఐదు మ్యాచ్‌లకిగానూ సన్‌రైజర్స్ కేవలం ఒకే ఒక మ్యాచ్‌లో విజయం సాధించింది. మరోవైపు కింగ్స్ ఎలెవన్ పంజాబ్ చివరిగా ఆడిన ఐదు మ్యాచ్‌లకిగానూ ఏకంగా నాల్గింటిలో గెలుపొందింది.

వాస్తవానికి సీజన్‌లో సగం మ్యాచ్‌లు ముగిసే సమయానికి పంజాబ్ టీమ్ పాయింట్ల పట్టికలో చిట్టచివరి స్థానంలో కనిపించింది. కానీ.. వరుస విజయాలతో గాడిలో పడిన ఆ జట్టు ఒక్కో స్థానం పైకి ఎగబాకుతూ వస్తోంది. మిగిలిన మూడు మ్యాచ్‌లను గెలిస్తే...? ఆ జట్టు ప్లేఆఫ్‌లో అడుగుపెట్టినట్లే..!