RCB vs DC: కోహ్లి సేనతో ఢిల్లీ పోరు.. గెలిచిన జట్టు టాప్-2లో.. మరి ఓడిన టీమ్..?

ఐపీఎల్ లీగ్ దశలో మరో రెండు మ్యాచ్‌లు మాత్రమే మిగిలి ఉన్నప్పటికీ.. ఇప్పటి వరకూ ముంబై మాత్రమే ప్లేఆఫ్స్‌కు చేరుకుంది. మిగతా మూడు స్థానాల కోసం నాలుగు జట్లు పోటీపడుతున్నాయి. రేపు (మంగళవారం) జరిగే మ్యాచ్‌లో ముంబైపై సన్‌రైజర్స్ గెలిస్తే.. మెరుగైన నెట్ రన్ రేట్ కారణంగా ఆరెంజ్ ఆర్మీ ప్లేఆఫ్స్‌కు చేరుకుంటుంది. మిగతా రెండు స్థానాల కోసం ఢిల్లీ/బెంగళూరు, కోల్‌కతా పోటీ పడాల్సి ఉంటుంది. ప్రస్తుతం ఈ మూడు జట్లు 14 పాయింట్లతో సమఉజ్జీలుగా ఉన్నాయి.

ఇవాళ ఢిల్లీ, బెంగళూరు మధ్య జరిగే మ్యాచ్‌‌లో గెలిచిన జట్టు ప్లేఆఫ్ చేరడంతోపాటు.. టాప్-2లో నిలుస్తుంది. రేపు సన్‌రైజర్స్ గెలవకపోతే.. కోల్‌కతాతోపాటు నేటి మ్యాచ్‌లో ఓడిన జట్టు సైతం ప్లేఆఫ్‌కు అర్హత సాధిస్తుంది. ఆరెంజ్ ఆర్మీ గెలిస్తే మాత్రం.. ఢిల్లీ/బెంగళూరు, కోల్‌కతాల్లో మెరుగైన నెట్ రన్ రేట్ ఉన్న ఒక జట్టు ప్లేఆఫ్‌కు చేరుకుంటుంది.

రేపటి మ్యాచ్‌లో సన్‌రైజర్స్ గెలిచినప్పటికీ.. ఇవాళ్టి మ్యాచ్‌లో ఓడిన జట్టుకు కూడా ప్లేఆఫ్ చేరే అవకాశాలు ఉంటాయి. ఇందుకోసం ఢిల్లీ, బెంగళూరు మధ్య జరిగే మ్యాచ్‌లో ఓడే జట్టు నెట్ రన్ రేట్ పడిపోకుండా చూసుకోవాలి. ఉదాహరణకు ఈ మ్యాచ్‌లో ఢిల్లీ ముందుగా బ్యాటింగ్ చేసి 160 రన్స్ చేసిందనుకుంటే.. బెంగళూరు 18 ఓవర్ల వరకూ లక్ష్యాన్ని చేధించకుండా ఢిల్లీ బౌలర్లు చూసుకోవాలి. ఒకవేళ ముందు బెంగళూరు బ్యాటింగ్ చేసి 160 రన్స్ చేస్తే.. ఢిల్లీ గరిష్టంగా 18 రన్స్ తేడాతో ఓడాలి. అప్పుడే ఢిల్లీ నెట్ రన్ రేట్ కోల్‌కతా కంటే మెరుగ్గా ఉంటుంది.

ఒకవేళ ఈ మ్యాచ్‌లో బెంగళూరు ఓడుతుందని భావిస్తే.. కోహ్లి సేన 160 రన్స్ చేస్తే... ఢిల్లీ 17.3 ఓవర్ల తర్వాతే లక్ష్యాన్ని చేధించాలి. ముందుగా ఢిల్లీ బ్యాటింగ్ చేసి 160 రన్స్ చేస్తే.. బెంగళూరు గరిష్టంగా 21 రన్స్ తేడాతో ఓడాలి. లేదంటే కోల్‌కతా నెట్ రన్ రేట్ మెరుగ్గా ఉంటుంది.