యాప్నగరం

SRH vs RR: వార్నర్‌ ఆ బౌలర్‌పై గెలిస్తే.. సన్‌రైజర్స్‌దే విజయం!

ఐపీఎల్ పాయింట్ల పట్టికలో ఐదో స్థానంలో ఉన్న సన్‌రైజర్స్.. రాజస్థాన్‌పై విజయం సాధిస్తే.. మళ్లీ టాప్-3లోకి అడుగుపెడుతుంది. ఈ మ్యాచ్‌లో స్టోక్స్ బరిలో దిగుతాడా లేదా అనేది అనుమానంగా మారింది.

Samayam Telugu 11 Oct 2020, 10:28 am
ఐపీఎల్ 2020లో సన్‌రైజర్స్ హైదరాబాద్, రాజస్థాన్ రాయల్స్ మధ్య నేడు ఆసక్తికర పోరు జరగనుంది. ఈ మ్యాచ్‌లో గెలిస్తే.. సన్‌రైజర్స్ హైదరాబాద్ పాయింట్ల పట్టికలో తిరిగి మూడో స్థానానికి చేరుకుంటుంది. శనివారం జరిగిన మ్యాచ్‌ల్లో విజయాలు సాధించిన కోల్‌కతా, బెంగళూరు.. పాయింట్స్ టేబుల్‌లో మూడు, నాలుగు స్థానాలకు చేరుకున్నాయి. ఈ మ్యాచ్‌లోనూ రాజస్థాన్ ఓడితే పాయింట్ల పట్టికలో చివరి స్థానానికి చేరుకుంటుంది. గెలిస్తే మాత్రం ఆరోస్థానానికి ఎగబాకుతుంది.
Samayam Telugu smith vs warner | Image: BCCI


ఈ సీజన్లో తొలి రెండు మ్యాచ్‌ల్లో అద్భుత విజయాలు సాధించిన రాజస్థాన్ రాయల్స్.. తర్వాత వరుసగా 4 మ్యాచ్‌ల్లో ఓడింది. ఆరంభ మ్యాచ్‌ల్లో అదరగొట్టిన శాంసన్, స్మిత్.. తర్వాత ఆకట్టుకోలేకపోతున్నారు. జోస్ బట్లర్ ఒక మ్యాచ్‌లో మాత్రమే రాణించగా.. మరో ఓపెనర్ యశస్వి జైస్వాల్ పరుగులు చేయడానికి ఇబ్బంది పడుతున్నాడు. మిడిలార్డర్‌లో తెవాతియా ఫర్వాలేదనిపించినా.. ఒత్తిడికి లోనవుతున్నాడు. సన్‌రైజర్స్‌తో మ్యాచ్ సంజూ శాంసన్‌‌కు ఐపీఎల్‌లో వందో మ్యాచ్ కావడం విశేషం.

సన్‌రైజర్స్‌తో మ్యాచ్‌లో రాజస్థాన్ స్టార్ ఆల్‌రౌండర్ బెన్ స్టోక్స్ ఆడేది అనుమానంగానే ఉంది. కోల్‌కతాతో ఓడిన తర్వాత మాట్లాడిన స్మిత్.. తర్వాతి మ్యాచ్‌లో స్టోక్స్ కచ్చితంగా బరిలో దిగుతాడని చెప్పలేకపోయాడు.

ఆరెంజ్ ఆర్మీ ప్రధాన బలం ఓపెనర్లే. పంజాబ్‌తో జరిగిన మ్యాచ్‌లో వార్నర్, బెయిర్ స్టో 15 ఓవర్లలోనే 160 పరుగులు చేసినా.. మిగతా బ్యాట్స్‌మెన్ బాగా ఆడకపోవడంతో సన్‌రైజర్స్ 201 పరుగులకే పరిమితమైంది. మనీష్ పాండే, విలియమ్సన్, ప్రియమ్ గార్గ్ రాణించాలని హైదరాబాద్ అభిమానులు కోరుకుంటున్నారు.

దుబాయ్ పిచ్ రెండో ఇన్నింగ్స్‌కు వచ్చేసరికి స్లో అవుతుండటంతో.. ఛేజింగ్ కష్టంగా మారుతోంది. ఇప్పటి వరకూ జరిగిన 10 మ్యాచ్‌ల్లో తొమ్మిందింటిలో ముందుగా బ్యాటింగ్ చేసిన జట్టే విజయం సాధించింది. దీంతో టాస్ గెలిచిన జట్టు ఫస్ట్ బ్యాటింగ్ చేయడానికే మొగ్గు చూపుతుంది.

గత మ్యాచ్‌లో కింగ్స్ ఎలెవన్ పంజాబ్‌పై 69 పరుగుల తేడాతో గెలుపొందిన సన్‌రైజర్స్.. ఈ మ్యాచ్‌లోనూ అదే జట్టుతో బరిలో దిగే అవకాశం ఉంది. జోఫ్రా ఆర్చర్.. 5 ఇన్నింగ్స్‌ల్లో డేవిడ్ వార్నర్‌కు బౌలింగ్ చేయగా.. నాలుగుసార్లు సన్‌రైజర్స్ కెప్టెన్‌ను ఔట్ చేశాడు. ఈ మ్యాచ్‌లో ఆర్చర్ బౌలింగ్‌ను వార్నర్ ఎలా ఎదుర్కొంటాడనేది కీలకం కానుంది.

మరోవైపు జోస్ బట్లర్ యావరేజ్ 20 కంటే తక్కువగా ఉన్నది సన్‌రైజర్స్‌పై మాత్రమే. ఆరెంజ్ ఆర్మీపై అతడి స్ట్రైక్ రేట్ 100 కంటే తక్కువే. గత మూడు ఇన్నింగ్స్‌ల్లో బట్లర్.. రషీద్ ఖాన్ బౌలింగ్‌లో ఔటయ్యాడు.

SRH Probable XI: David Warner (C), Jonny Bairstow (WK), Manish Pandey, Kane Williamson, Priyam Garg, Abhishek Sharma, Abdul Samad, Rashid Khan, Sandeep Sharma, T Natarajan, Khaleel Ahmed.

RR Probable XI: Yashasvi Jaiswal, Jos Buttler (WK), Steve Smith (C), Sanju Samson, Ben Stokes, Mahipal Lomror, Rahul Tewatia, Jofra Archer, Shreyas Gopal, Kartik Tyagi, Varun Aaron/Jaydev Unadkat.

తరవాత కథనం

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.
తాజా వార్తల అప్డేట్ల కోసం Samayam Telugu ఫేస్‌బుక్పేజీను లైక్ చెయ్యండి.