బ్యాటింగ్‌లో హైదరాబాద్ తడబాటు.. కోల్‌కతా టార్గెట్ 143

ఐపీఎల్ 2020 సీజన్‌లో వరుసగా రెండో మ్యాచ్‌లోనూ సన్‌రైజర్స్ హైదరాబాద్ బ్యాట్స్‌మెన్‌లు నిరాశపరిచారు. కోల్‌కతా నైట్‌రైడర్స్‌తో అబుదాబి వేదికగా శనివారం రాత్రి జరుగుతున్న మ్యాచ్‌లో టాస్ గెలిచి తొలుత బ్యాటింగ్ చేసిన సన్‌రైజర్స్ హైదరాబాద్ 4 వికెట్ల నష్టానికి 142 పరుగులే చేయగలిగింది. మిడిలార్డర్ బ్యాట్స్‌మెన్ మనీశ్ పాండే (51: 38 బంతుల్లో 3x4, 2x6) టాప్ స్కోరర్‌గా నిలవగా.. కోల్‌కతా బౌలర్లలో పాట్ కమిన్స్, వరుణ్ చక్రవర్తి, ఆండ్రీ రసెల్ తలో వికెట్ తీశారు.


మ్యాచ్‌లో టాస్ గెలిచిన హైదరాబాద్ కెప్టెన్ డేవిడ్ వార్నర్ మరో ఆలోచన లేకుండా బ్యాటింగ్ ఎంచుకున్నాడు. అయితే.. మంచి ఫామ్‌లో ఉన్న ఓపెనర్ జానీ బెయిర్‌స్టో (5: 10 బంతుల్లో) నిరాశపరచగా.. అనంతరం వచ్చిన మనీశ్ పాండే‌తో కలిసి డేవిడ్ వార్నర్ (36: 30 బంతుల్లో 2x4, 1x6) నెమ్మదిగా ఇన్నింగ్స్ నడిపించాడు. కానీ.. ఇన్నింగ్స్‌ 10వ ఓవర్‌లో మిథున్ చక్రవర్తి విసిరిన బంతిని అర్థం చేసుకోలేక వార్నర్ ఔటవగా.. తర్వాత వచ్చిన సాహా (30: 31 బంతుల్లో 1x4, 1x6) ఆశించిన వేగంగా ఆడలేకపోయాడు. అయినప్పటికీ.. చివర్లో మహ్మద్ నబీ (11 నాటౌట్: 8 బంతుల్లో 2x4) రెండు బౌండరీలు బాదడంతో హైదరాబాద్ 142 పరుగులైనా చేయగలిగింది.